Ioh kurup ki pulit East Jaintia Hills ia u drok heroin ba 22.03 gram, shah kem arngut

Syllad | The Rising MeghalayaNovember 16, 2023

Ki pulit ka East Jaintia Hills haka sngi Balang ki la ioh ban kurup drok heroin uba don ka jingkhia kaba 21 gram bad 1.03-gram na ki arngut ki briew kiba wan napoh Silchar sha ki bynta jong ka thain Khliehriat.

Ki bor pulit hadien ba ki la ioh ia ka jingtip kaba thikna ha kaba iadei bad uwei u briew uba kyrteng u Manoj Muksor 23 snem rta uba dei na Mihmyntdu Jowai uba wan na Silchar ha ryngkat une u jingdih pynbuaid ba beain.

Kumta ki pulit ki la pynlong ka jingpynap shrip hapoh ka shnong Nongsning ha ka lynti surok bah NH-06 bad pynlong ka jingtalasi ia baroh ki kali kiba wan na ka thain Lumshnong.

Ha ka por kumba 5:30 nohphaisngi ki pulit kila lap ia kawei ka local taxi kaba don ia u nombor ML 11 3594 ba la shong da ki arngut ki briew ha ryngkat u nongniah. Ha ka jingtohkit la shem ba uwei na kine ki passenger u dei u suba donkti ha ki kam khaii drok. 

Kumta ki la pynlong ka jingtalasi ha ka jingiadon lang ki sakhi ba laitluid ha kaba ki la lapdien ia artylli ki synduk sabon na ka pla jong u Manoj bad lap ia u kynja powder stem uba don ka jingkhia kaba 21 gram. Kumjuh ha ka jingtalasi ia u Vicky Dkhar 26 snem rta uba dei na ka shnong Mihmyntdu Jowai la lapdien ia 34 tylli ki bilor rit kiba don ia une u juh u powder uba khia 1.03 gram.

Ha ka jingleh ia ka test la pynshisha ba une u powder u dei u heroin, kumta na ka liang ki pulit ki la kem noh ia kine ki arngut  na ka bynta ban pynlong shuh shuh ia ka jingtohkit. Na kine ki pulit ki la ioh ban kurup noh ia artylli ki mobile phone kynthup ia ki artylli ki pla.