Ioh kurup ki BSF ia u drok heroin bad yaba tablet na Ranikor, kem arngut

Syllad | The Rising MeghalayaJune 2, 2024

Ha ka jingbteng ban tehlakam ia ki kam bymman ha ki thain khappud jong ka ri, ki shipai Border Security Force (BSF) ka Jylla ha ka 1 tarik mynta u bnai ki la ioh  kurup ia u drok heroin bad ki dawai kuli yaba tablet bad kem noh ia arngut ki briew kiba donkti na ka thain  Ranikor, South West Khasi Hills District.

Na ka liang ki shipai BSF ki la pynpaw ba hadien ba ki la ioh ia ka jingtip kaba thikna, kumta ruh mardor ki la pynlong ka jingpynap shrip bad ioh ban bat noh ia kawei ka kali Alto kaba thmu ban leit sha ki bynta khappud ha kaba ki la ioh ban kurup 10 gram u drok heroin bad haduh 2,469 tylli ki yaba tablet bad kem noh ia ki arngut ki briew kiba donkti.

Kine ki arngut ki nongkhaii drok kiba la shah kem noh ki dei kiba la tip kyrteng kum u Joydeep Paul bad u Nabajit Sen kiba nadpoh East Khasi Hills District.

Hadien kane ki BSF ki la aiti noh ia kine ki drok ba la ioh kurup kumjuh ia kine ki arngut ki briew sha ki pulit jong ka Ranikor Police Staion ba kin bteng shuh shuh ia ka jingtohkit.