Ioh kurup ki BSF haduh 96 tylli ki masi ba thmu ban khaii beain shapoh Bangladesh

Syllad | The Rising MeghalayaSeptember 9, 2023

Ki shipai Border Security Force (BSF) Meghalaya ha ka 8 tarik mynta u bnai ki la ioh ban kurup noh haduh 96 tylli ki masi na ki bynta khappud ka East Khasi Hills bad West Jaintia Hills ia kiba la thmu ban shalan beain shapoh Bangladesh.

Hadien ba la ioh ia ka jingtip kaba bniah, ka kynhun ki shipai BSF na ka 4th bad 193rd Battalion ki la ioh ban kurup noh ia kine ki 96 tylli ki masi ia kiba la pynpoi sha ki jaka khappud jong ka ri da ka jingthmu ban khaii beain shapoh Bangladesh.

Hadien ka jingiatyngkhuh kynsan bad ki shipai BSF ki runar kiba donkti ha kane ka kam beain ki la phetkrad noh da kaba shim kabu namar ka jaka ba long riat bad iehnoh shadien ia kine ki masi.

Ha kawei pat ka jingkhynra, ki BSF na ka 43rd Battation ka BSF Meghalaya ha ryngkat ka jingiatreilang bad ki bor pulit ka jylla ki la lapdien ia kawei ka kali hajan Rongra ha ki bynta khappud ha ryngkat shibun bah ka shini ia kaba la thmu ban shalan beain shapoh Bangladesh lyngba ki jaka khappud ka South Garo Hills.

Hadien la kem noh ruh ia u nongniah jong ka kali namar ka jingbym lah ban pynshisha ha kaba iadei bad ka jaka ba thmu ban pynpoi ia kane ka shini.Ia une u briew bad ia ka mar ba la ioh kurup la aiti noh sha ki bor pulit na ka bynta ban leh shuh shuh ia kaba donkam.