Ioh kurup ki BSF haduh 74 tylli ki Masi ba thmu ban shalan beain sha Bangladesh

Syllad | The Rising MeghalayaOctober 6, 2023

Ki shipai Border Security Force (BSF) ha ka 4 tarik une u bnai Risaw ki la ioh kurup haduh 74 tylli ki masi ia kiba la thmu shalan beain shapoh Bangladesh.

Ki BSF na ka 4th & 193rd Battalion ki la ioh ban kurup noh ia kine ki masi hadien ba ki la pynlong ia ka jingtalasi ha ki bynta khappud jong ka East Khasi Hills kiba markhap bad ka Bangladesh.

Hadien kane la aiti noh ia kine ki masi ba la ioh kurup sha Police Station na ka bynta ban leh iaka ba donkam.

Na kane ka tnat shipai ka la pynpaw ba ka dang iai bteng ban pynjur ia ka jingpahara bad ban peitngor da kaba pynlong ruh ia ki jingtalasi khnang ban lah ban tehlakam ia ki kam khaii beain shapoh Bangladesh.

Shuh shuh kane ka tnat shipai ka la pynpaw ruh ba kila ioh kurup palat 2500 tylli ki masi ba thmu shalan tuh sha Bangladesh naduh u bnai Kyllalyngkot ba la dep.