Ioh kurup ki BSF haduh 19 tylli ki lieng ki nong Bangladesh ba thmu wan tuh maw tuh shyiap

Syllad | The Rising MeghalayaJuly 31, 2024

Ki shipai Border Security Force (BSF) ka Meghalaya ha ka 29 tarik Naitung ki la ioh ban kurup noh haduh 19 tylli ki lieng kynda jong ki nongkhaii tuh na Bangladesh na ka wah Jadukata hajan Ghumaghat katba ki dang pyrshang ban wan rungtuh sha u pud u sam jong ka India ban tuh maw tuh shyiap.

Ka jingkloi jong ki shipai BSF ka la pynpulom noh ia kane ka jingthmu kam beain jong kine ki kynhun na Bangladesh bad ban pynthikna ruh na ka bynta ban pynneh ia ka shongsuk shongsain hapoh ka thain khappud.

Kiba kum kine ki jingkhynra kiba kyrpang ki dei ki sienjam kiba la pyndonkam khah khah da ki shipai BSF ha ki thain khappud jong ka ri. Hynrei, watla katta ki nongkam bymman na Bangladesh barabor ki iai pyrshang ban wan rungtuh sha ki bynta jong ka ri lyngba ki jaka ba long riat na ka bynta ban tuh maw tuh shyiap.

Halor kine ki kam beain na ka liang ki BSF ki la pynpaw ba ki la ujor sha ki shipai khappud BGB ka Bangladesh ba kin leh ia kaba donkam.

Ia kine ki lieng ba la ioh kurup la aiti noh sha ki bor ba dei khmih ka tnat Custom ha Dangar, East Khasi Hills.

Ban pynneh ia ka shongsuk shongsain ha ki bynta khappud ka India-Bangladesh la pynlong ruh ia ka jingialang hapdeng ki heh shipai Commandant ka BSF-BGB ha ka 29 tarik mynta u bnai ban iakren halor kiba bun ki mat kaba kynthup ban pynneh ia ka shongsuk shongshngain ha ki thain khappud jong kine ki artylli ki ri.