Ioh kurup ka SIT ia ki jingdeng ksiar bad laptop ka Sonam na ka jingkhynra ha Madhya Pradesh

Syllad | The Rising MeghalayaJune 29, 2025

Ka kynhun Special Investigation Team (SIT) haka 28 tarik Jylliew ka la ioh ban kurup ia ki jingdeng ksiar kiba dei jong ka Sonam Raghuvanshi bad u (L) Raja Raghuvanshi na ka jingkhynra hapoh kawei ka jaka sah (flat) jong u Shilom James kaba don hapoh Ratlam District ka Madhya Pradesh.

U Superintendent of Police ka East Khasi Hills, u Bah Vivek Syiem u pyntip ba ka kynhun SIT ka la pynlong ia kane ka jingkhynra ha ka jingialam da u Sub Inspector (SI) Bah Anthony Khongsit bad SI Karan Pachua ha ryngkat ka jingsynran lang ki ophisar bad ki pulit napoh Alkapuri Police Station.

“Ha kane ka jingkhynra, ka kynhun ka la ioh ruh ban kurup ia ka laptop, pendrive bad shibun ki kot ki sla na ka jaka sah jong u Shilom James,” u la ong da kaba bynrap ba kine ki tiar ba la ioh kurup la ngeit ba ki long ki sakhi kiba kongsan bha ha kaba iadei bad kane ka jingtohkit kaba dang iaid shakhmat halor ka jingshah pyniap jong u Raja Raghuvanshi.

Ha ka 26 tarik Jylliew ka Iingkashari ha ka nongbah Shillong ka la aibor ban set hynriew sngi ia u Shilom James lem bad arngut kiwei pat kiba la shah kem noh halor ka jingpynjulor ia ki sakhi satar kiba kongsan kiba iadei bad katei ka jingjia shah pyniap jong utei u nongkhaii na Indore u Raja Raghuvanshi ha ka thain Sohra.

U Shilom James u dei u nongdie iing bad jaka uba la ai jaka sah ia u Vishal Singh Chauhan uwei na kiba la shah kynnoh donkti hakhmat eh ha kane ka jingjia kam pyniap.

Ki arngut kiwei pat kiba la shah kem ki kynthup ia u Lokendra Singh Tomar uba shong ba sah ha Gwalior, Madhya Pradesh uba dei ruh u trai jong ka jaka sah (flat) hapoh Dewas Naka ha kaba ka Sonam kaba la shah kynnoh donkti hakhmat eh ha katei ka kam pyniap ka shong ka sah ha ka por ba ka la phet rieh hapoh Indore, bad u Balia Ahirwar uba dei u nongap pahara uba trei ha katei ka complex kaba don katei ka jaka sah ba la longtrai da u Shilome James.