Ioh kurup drok Heroin ba shongdor haduh T. 2.59 klur na Shillong, kem arngut

Syllad | The Rising MeghalayaNovember 26, 2023

Ha kawei na ki jingioh kurup drok kaba heh, ka tnat Custom ka la ioh ban kurup ia u drok Heroin uba shongsor haduh 2.59 klur tyngka bad kem noh ia arngut ki briew na ka nongbah Shillong.

Hadien ba la ioh ia ka jingtip kaba bniah halor ka jingwan poi jong u drok lyngba ka kali napoh Silchar, Assam, ki heh ophisar na ka tnat CCP Shillong ha ka 22 tarik Naiwieng ki la ioh ban bat noh ia kawei ka kali Tata Punch ha ka por janmiet na ki bynta jong ka shnong Nongmynsong, Shillong.

Hadien ka jingtohkit ia ki briew kiba don hapoh jong ka kine ki briew ki la kyntait bad saitkhuid ba ki la wan ha ryngkat u drok ba la pynkit da kane ka kali. Hynrei, hadien ka ka jingkhynra iaka kali la lapdien ia 30 tylli ki jingsop sabon na ki bynta jong ka dashboard jong ka kali, ba hadien ba la leh ia ka test la shem ba u dei u drok heroin.

Hadien ba la jurip bniah la shen ba une u drok heroin u don haduh 370-gram bad u shongdor haduh kumba 2.59 klur tyngka. Na ka liang ka tnat ka la kem noh ia arngut ki briew na ka bynta ban pynlong shuh shuh ia ka jingtohkit, ong u kyrwoh na ka Tnat Commissioner of Custom Preventive (CCP) haka 25 tarik Naiwieng.

Na ka liang ka Tnat ka la pynpaw ba ka don ia ka thong ban iakhun pyrshah ia baroh ki kam bein lyngba ki jaka khappud, kata naduh ki kam khaii drok, ksiar, sikret, pisa thok bad kiwei pat ki kam beain.

Ka Tnat ka la pynpaw ruh ba ka la iatrei ryngkat ryngkat lang bad ki tnat bapher bapher ka sorkar halor ki kam snem ha khappud, khaii beain, ka jingbuhrieh spah bad kiwei ki kam beain. Kumjuh ka pyntip ruh ba kino kino kiba ai jingtip na ka liang ka tnat kam buhrieh ia ki kyrteng ki jong ki, hynrei ka don ruh ka khusnam ba kyrpang na ka bynta jong ki.