Ioh kurup drok ba T.40 lak, iohkem ki pulit uwei na Byndihati

Syllad | The Rising MeghalayaAugust 18, 2025

Ka kynhun Anti-Narcotics Task Force (ANTF) ha ryngkat ki pulit ka East Jaintia Hills, ki la ioh ban kem noh ia uwei u nongkhaii drok uba dang wan na na Churachandpur, Manipur sha Shillong bad ioh ban kurup noh ia u heroin uba shongdor palat T.40 lak.

U Superintendent of Police ka EJH u Vikash Kumar, IPS u la ong ha ka miet jong ka 16 tarik Nailar ka kynhun ANTF ka la ioh ia ka jingtip kaba thikna ha kaba iadei bad uwei u briew uba mih na Churachandpur, Manipur ban wan sha Shillong da ka bos kit paidbah ha ryngkat u drok.

Kumta ki heh ka ANTF ryngkat ki pulit ka Khliehriat ha ka 17 tarik Nailar ki la pynlong ka jingpynap shrip ha ka shnong Byndihati bad ha ka por kumba 2:15 nohphai sngi ki la pynieng noh ia kawei ka bos kaba don ia u No AS-01-JC-4999 kaba mih na Silchar ban wan sha Shillong bad ioh ban kem noh ia une u briew uba kyrteng u Isak L. Joute 26 snem rta ba kam ba u dei na Madanriting, Shillong.

Ha ka jingtalasi hapoh ka kyndon NDPS Act ha ryngkat ka jingiadon lang ki sakhi ba laitluid ki pulit ki la ioh ban kurup noh 9 tylli ki synduk sabon kiba don haduh 91.86 gram u drok heroin uba shongdor palat T.40 lak.

Hadien ki pulit ki la register case pyrshah ia u ha Khliehriat Police Station hapoh ka kyndon NDPS Act bad ka jingtohkit ka dang iaid shakhmat ban lapdien shuh shuh ia kiwei pat kiba donkti.