Ioh kurup 42.10 gram u drok heroin na Rilbong

Syllad | The Rising MeghalayaSeptember 2, 2025

Ka kynhun Anti-Narcotics Task Force (ANTF) ka East Khasi Hills ha ka 1 tarik Nailur ka la ioh ban kem noh ia ki ar ngut ki suba nongkhaii drok bad ioh ban kurup haduh 42.10 gram u heroin.

Kine ki ar ngut kiba la shah kem ki dei Sadik Ahmed (27 snem) bad ka Arti Dorjee (28 snem).

KI ANTF Meghalaya hadien ba la ioh ia ka jingtip kaba thikna, kila la pynlong ka jingleit khynra hapoh kawei ka iing ba la shongwai jong kine ki ar ngut ha Nepali compound ha Rilbong ha ka por 10 baje mynmiet.

Ha kane jingkhynra ki pulit ANTF ki la ioh ban kurup noh ia ki saw tylli ki synduk sabon ha kaba la thep ia ki suba drok, bad hadien ba la test ha ka jingiadon lang ki sakhi la shem ba u dei u heroin uba don ka jingkhia kaba haduh 42.10 gram.

Halor kane ka jingioh kurup ki pulit la register case hapoh ka kyndon ka NDPS Act. Baroh kine ki arngut kiba la shah kynnoh donkti la kem noh na ka bynta ban pynlong ia ka jingtohkit.