Ioh kurup ka Custom Shillong 27 kilo ki bniat Hati, shah kem uwei

Syllad | The Rising MeghalayaMay 31, 2024

Ki ophisar na ka Tnat Custom (Preventive) HQ Shillong ha ka 29 tarik Jymmang ki la ioh ban kurup haduh 27.992 kilo ki bniat hati (Ivory) bad kem noh ia uwei u briew uba donkti ha kane ka kam beain.

Hadien ba la ioh ia ka jingtip kaba bniah halor ka kam khaii beain ia ki bniat Hati, ki ophisar ka Tnat Custom (Preventive) HQ Shillong ki la hiar mar mar sha Biswanath Chariali hapoh Assam ha kaba ki la ioh ban bat noh ia uwei u briew uba donkti bad ioh ban kurup ia ki sawtylli ki lyngkhot bniat Hati kiba hap haka thup jong ki Indian (Asian) Elephant (Elephas maximus) kiba don ia ka jingkhia kaba haduh 27.992 kilo.

Ia ki bniat hati la pynhap hapoh ka Schedule I jong ka Tnat Wildlife Protection Act (WLPA), 1972.

Ia kine ki bniat Hati la kurup noh hapoh ki kyndon Section 50 jong ka WLPA, 1972 (kaba la pynkylla) ha ka 29 tarik mynta u bnai bad ia kane ka case la aiti noh sha ki bor ba dei khmih jong ka Tnat Wildlife.

Na ka liang ka Tnat Custom ka la pyrto ruh ia ka jingiatreilang bad ka jingiarap jong ki bor pulit ka Biswanath bad na ka liang ki heh ka Tnat Forest ha kaba iadei bad kane ka bynta.

Lyngba ka jingpynkylla kaba dang shen ia ki kyndon jong ka Wildlife Protection Act naduh ka 1 tarik u Iaiong 2023, kumta ruh ki heh ka Tnat Custom ki la ioh ia ka bor na ka bynta ban tehlakam bad ban kem ia kiba donkti ha ki kam khaii beain ia ki mrad ne ia ki mar khlaw ba la khein beain.

Ha kine ki shi snem ba la dep, ka Commissionerate of Customs (Preventive), NER ki la ioh ban kurup haduh laisien ia ki snieh kyrbei kiba don ka jingkhia kaba haduh 68.87 kilo, kumjuh ka jingioh kurup ia 11.536 kilo ka dohkha whale ne Ambergris nalor 360 gram ki bniat Hati nalor ki jait sim kiba kynthup ia ki Hornbills, Flame bowerbirds bad i khun shrieh orangutan kiba hap hapoh ka jingai jingiada jong ka CITES bad Wildlife Protection Act, 1972, kiba treikam hapoh ka Jylla Meghalaya, Mizoram bad Assam.