Ioh khusnam ka Moolamylliang kum ka shnong kaba ka khuid ha East Jaintia Hills

Syllad | The Rising MeghalayaJanuary 26, 2021

Ka shnong Moolymylliang kala ioh iaka khusnam “Cleanest Village Award 2021’ ne ka shnong kaba khuid tam hapoh ka District East Jaintia Hills District.

Ka District Swachh Bharat Mission (Grameen), East Jaintia Hills District kala ai ia kane ka khusnam sha ka shnong Moolamylliang hadien ba kala jop iaka jingiakop pynkhuid shnong kaba la pynlong ha u snem 2020 hapoh ka Swachh Bharat Mission Grameen.

Ia kane ka award la shimti da u Apmon Pachiang, waheh shnong Moolamylliang na u Renikton L Tongkhar u myntri ka tnad PHE bad kiwei uba long u kongsan haka jingrakhe iaka Republic Day kaba 72 ha Khliehriat.

Lah ban pynkynmaw hangne ba ka shnong Moolamylliang ka dei kawei na ki shnong kaba la thung shibun ki dieng ha baroh sawdong ka shnong naduh ka snem 2014 bad iai bteng haduh mynta. 

Shuwa kane kala don ka jingpynher iaka lama lai rong ka ri da u kongsan, la iadonlang u Deputy Commissioner, East Jaintia Hills E Kharmalki, SP Deepak Kumar Palecha bad kiwei kiwei.

Haka parade la shimbynta da ka tnad Pulit ka East Jaintia Hills District bad la pyni nam ruh iaki tableau da ki tnad sorkar bapher.

Ban pynphuh pynphieng iaka jingrakhe iaka jingioh iaka riti synshar ba pura ka ri kala don ruh ka prokram pynbyrngia kaba la shimbynta da ki samla bad khynnah na ki shnong bad ki skul hapoh ka district.