Ioh khusnam Crystal Award 2021 u samla na Chilliangraij, Jowai

Syllad | The Rising MeghalayaAugust 12, 2021

Ka Khusnam Mattithaw ne Crystal Award 2021 na ka bynta ka jingtbit ha ki kam thohdur la pynkup da u Lat ka Jylla, Satyapal Malik ia u samla Wanhi-I Challam na Chilliang Raij, Jowai ha paki dulan jong u Lat mynta ka sngi ka ba dei ka lynkhuh sngiap ba saw jong ka samla Crystal Gayle Kharnaior.

Ia kane ka khusnam la seng da ka synjuk ki barikor Khasi, ka Riti Academy ha ka ba mynta u snem la ibit ia ki kam ban kynsai jong u samla Wanhi-I Challam u ba la shna ki durboit animation film shaphang u Kiang Nangbah, u Mar Phalyngki, ka Behdeinkhlam bad kiwei kiwei.

U kongsan ha kane ka sngi, u Satyapal Malik, u Lat ka jylla u la kren mardor ba la donkam ban seng noh da ka shlem pule shaphang ka thohdur ka ba lah ban ai jingtbit ha ki kyrdan pule ki ba halor, khnang ba ki samla na ka jylla kim donkam ban hap leit pule sha jngai na la jylla, khamtam ki ba duk ba kyrduh.

Ha ka jingrakhe ia kane ka sngi ban kynmaw ia ka samla Crytal Gayle Kharnaior, ka Riti Academy ka ju sam khusnam sha ki samla ki ba tbit ha kane ka liang jong ka thohdur, ka sawangka, ka shna durim bad kiwei kiwei ki snap jong ka sap tynrai.

Kiwei ki ba la kren ha kane ka kjingrakhe sam khusnam ki long u Bah F R Kharkongor, u kher rangbah jong ka tnat sorkar Deiriti ne Commissioner & Secretary, Arts and Culture Department bad u Bah Raphael Warjri, u khliehduh jong ka Riti Academy.