Ioh khur takma ki lai ngut ki khynnah ka Jylla na ka lympung ialehkai Karate ha Uttarakhand

Syllad | The Rising MeghalayaJune 17, 2025

Lai ngut ki khynnah ialehkai Karate ka Jylla ki la ioh ban khur takma na ka lympung ialehkai Karate ba la tip kum ka “4th KIO National Cadet – Junior & Sub Junior Karate Championship 2025” kaba a long Dehradun, Uttarakhand naduh ka 12 haduh ka 15 tarik mynta u bnai.

Ha kane ka lympung ka Esaranaki Kharjana ka la ioh ba kan khur ia ka takma rupa katba ka Daphishisha Shadap bad u Royal Jaden Laloo ki la ioh ba kin khur ia ki takma rnong.

Ha kane ka kynti, na ka liang ka synjuk ialehkai karate ba la rim bha ka jylla, ka All Meghalaya Karate Do Assiation, ka la phah ia ka kynhun ialehkai kaba 28 ngut, hapoh ka jingialam ka jong u bah Donboklang Lyngdoh, bah  Edwillbert K Nongkynrih bad ka Ester Mary Lyngdoh, ha kaba napdeng kine ki 28 ngut, kine ki lai ngut ki la ioh ban khur takma.

Ka takma rupa kaba ka Esaranaki Kharjana ka la ioh ba kan khur ka la wan ha ka kyrdan iakhun jong ka sub junior girls 13years individual kumite.

Katba Daphishisha Shadap kala ioh ba kan khur ia takma rnong na ka kyrdan iakhun jong ka junior girls 48kg individual kumite, bad u Royal Jaden Laloo  u la iohban khur ia ka takma rnong na ka kyrdan iakhun jong ka Sub Junior Boy’s 11 year 40kg individual kumite.

Na ka liang ka AMKA ka shim ia kane ka kabu ba kan ai khublei ia kine ki lai ngut ki khynnah bad kumjuh ia kiwei pat kiba la leit ban iashim bynta sha kane ka rynsan iakhun, ha kaba jan baroh na ki nongiashim bynta kampher wat la kim shim la ioh ban kheit ia u soh bathiang, pynban ki la pynpaw ia katta ka mynsiem iakhun ka jong ki.