Ioh kem ki pulit ia uba khyllied skad ha Umsohsun na Jorhat, Assam

Syllad | The Rising MeghalayaMay 29, 2025

Hadien ka jingthwet kaba jur ki pulit ka East Khasi Hills tang hapoh lai sngi ki la ioh ban kem noh ia u ‘riew khlemrain uba donkti ha kaba khyllied skad bad shondur ia kawei ka khynnah skul ha kane ka taiew ba la dep ha ka thain Umsohsun, Shillong.

U Superintendent of Police ka District, u Bah Vivek Syiem u pyntip ba une u briew  ba la shah kem u dei u bar jylla na Assam uba kyrteng u Himan Gogoi ba 24 snem ia uba la ioh ban kem noh na Jorhat, Assam.

Nalor kata ki pulit ki iathuh ruh ba une u briew u dei uba trei hapoh kawei ka restaurant ha ka thain Oakland Road, Shillong. Hashwa jong katei ka jingjia ha Umsohsun la ong ba une u riew bymman u la leh ruh ia kaba kum kane kajuh ka kam poh ha ka thain Dreamland, Police Bazar ia kawei ka khynnah skul ha ka 19 tarik Jymmang.

Une u heh pulit u pyntip ba hadien ka jingsaphriang jong katei ka video kaba pyni ia ka kam bymman jong utei u briew ha ka thain Umsohsun, kumta la thaw ia ka kynhun ba kyrpang jong ki pulit hapoh ka jingialam u Additional Superintendent of Police (Ops), u Bah Ivan B Diengdoh ha ka 26 tarik Jymmang ban pynlong ka jingthwet ban ioh kem ia une u briew.

U Bah Vivek u la ong ruh ba ki la ioh jingtip ba kane ka jingjia ha Umsohsun ka dei kaba la jia ha ka 23 tarik Jymmang ha ka por kumba 6:30 mynstep ha kaba ki pulit ki la ioh pdiang ruh ia ka ejahar ha Lumdiengjri Police Station ha kaba la register ia ka case hapoh ka kyndon 76/79 BNS bad 11/12 jong ka POCSO Act.

U la bynrap ba ia kawei pat ka ejahar la mudui hapoh Sadar Police Station ha kaba kawei pat ka khynnah skul ka la ngat ha kaba kum kane ka juh ka jingjia ha ka 19 tarik Jymmang ha ka por kumba 7.15 bad 7.30 mynstep ha ka thain Dreamland, Police Bazar ha kaba ia ka case la register hapoh ka kyndon 7/8 jong ka POCSO Act.

“Ka kynhun pulit ba kyrpang hadien ba ki la lah ban ithuh ia une u riew bymman uba kyrteng u Himan Gogoi kumta ha ka 28 tarik ki la hiar sha Jorhat bad ha ka por mynstep ha ryngkat ka jingiarap da ki bor pulit ka Lahdoigarh Outpost ki la pynlong ka jingkhynra bad ioh ban kem noh ia une u briew na ka iingsah jong u ha ka shnong Bamkukurachua, Jorhat, Assam,” ong u SP. 

Ki pulit ki la ioh ruh ban kurup noh ia ka mobile phone ba  la pyndonkam da une u briew kynthup ia kiwei pat ki sakhi satar.

U SP u pyntip ruh ba ia une u briew yn sa ialam noh ban tian bishar hapoh District Court Jorhat bad hadien ba la ioh jingbit ban pynkynriah ia u sha kane ka jylla, yn sa ialam tian bishar ia u hapoh ka iingkashari ha Shillong.