Ioh kem ki BSF ia 7 ngut ki nong Bangladesh bad 2 nong India na ki bynta khappud

Syllad | The Rising MeghalayaMarch 16, 2025

Hadien kiba bun tylli ki jingkhynra ba seisoh, ki shipai Border Security Force (BSF) Meghalaya ha ka 14 tarik Lber ki la ioh ban kem ia hynniew ngut ki nong Bangladesh bad arngut ki nong India na ki bynta khappud ka East Khasi Hills (EKH), East Jaintia Hills (EJH) and South Garo Hills (SGH) district ka Jylla.

Hadien ba la ioh ia ka jingtip kaba bniah na ki tnad syntiat, ki shipai BSF na ka 172 Bn ki la pynlong ia ka jingkhynra kaba kyrpang ha ki bynta khappud ka East Khasi Hills kaba la lam sha ka jingioh kem ia ki sawngut ki nong Bangladesh. Kine ki briew ki dang pyrshang ban wan rungtuh sha India ban leit iashim bynta ha ka jinglehniam jong kiba haiing kiba la shong la sah ha kane ka ri. Baroh kine ki briew ba la shah kem la pynthikna ba ki dei ki nongshong shnong ka ri Bangladesh.

Ha kawei pat ka jingjia, ki shipai BSF na ka 22Bn ki la ioh ban kem noh ia laingut ki nong Bangladesh na ki bynta khappud jong ka ri  na South Garo Hills katba ki dang pyrshang ban wan rung sha India na ka bynta ban wad kam wad jam.

Katba ha kawei pat ka jingjia ki shipai BSF na ka 04 Bn ki la kem noh ia arngut ki nong India bad kurup noh ia ka kali kaba kit ia shibun bah ka shini na ki bynta ka surok khappud Nayabazar-Pynursla, East Khasi Hills ia kaba la thmu ban khaii tuh shapoh Bangladesh.

Hadien ia kine ki briew kumjuh ia ka kali ba la ioh kurup la aiti noh sha ki bor pulit ka thain na ka bynta ban leh shuh shuh ia kaba donkam katkum ka ain.