Ioh kamra klas thymmai ka RC Eve Secondary School, Mihmyntdu da ka jingiarap ka Archdiocese na Germany & Khublei Germany

Syllad | The Rising MeghalayaMay 2, 2025

U president ka Khublei Germany, Gerhard Albert haka 1 tarik Jymmang ula plie paidbah iaki san tylli ki kamra klas thymmai jong ka RC Eve Secondary School, Mihmyntdu.

Ia kane ka kamra klas thymmai la iarap pisa da ka Archdiocese jong ka Bamberg Germany bad ka Khublei Germany lyngba ka Jaintia Hills Development Society (JHDS).

La kyrkhu ia kine ki kamra klas thymmai da u Most Rev. Ferdinand Dkhar, Bishop ka Jowai Diocese haka jingiadonlang u Waheh Shnong ka Dorbar Shnong Mihmyntdu u Ma Abul Phawa, u Director ka Jaintia Hills Development Society u Fr. Manbha Pakem, ka Kong Almo P. Syiem, District School Education Officer West Jaintia Hills, ki dkhot jong ka School Managing Committee, bad kiwei de ki riew pawkhmat.

Ia kane ka skul la seng naduh u snem 2004 kaba mang kyrpang na ka bynta ki khynnah skul kiba wan na ka longiing baduk bad ki bym iohlad ban pule kum kiwei pat ki khynnah skul.

U Gerhard Albert u la ai ka jingiaroh ia ka Jaintia Hills Development Society, ka School Managing Committee, ka Balang Katholik Mihmyntdu, ki nonghikai bad kiwei kiba donkti ha ka ban pynieng ia katei ka iingskul. U la kyntu ruh ia ki kynnnah skul ba kin pyndonkam hok ia kane ka shlem ai jinghikai na ka bynta ka jingmyntoi jong ki.

Ka Kong Almo P. Syiem, District School Education Officer West Jaintia, ka la pynpaw ia ka jingsngewnguh jong ka ia ki nongpyniaid jong kane ka skul kiba la kdup la lang ia kum kine ki khynnah kiba shem jingeh ha ka jingpule jong ki. Ka la kular ruh ba na ka liang ka Education Department kan ialeh katba lah ban iatreilang bad kane ka skul khnang ban kyntiew shuh shuh ia ka roi ka par jong katei ka shlem ai jinghikai.

La pynphuh pynphieng shuh shuh ia kane ka sngi da ki prokram bapher bapher ba la shimbynta da ki khynnah pule bad ki nonghikai jong katei ka skul