Ioh ka Meghalaya T.30.40 klur na ka bhah Sorkar Pdeng sha ki jylla ba shah ktah na ki jingshlei um

Syllad | The Rising MeghalayaJuly 11, 2025

Ka Sorkar Pdeng ka la mynjur ban pyllait ia ka song pisa kaba T.1,066.80 klur sha ki hynriew tylli ki jylla kiba shah lynshop ha ki jingshlei um bad ki jingtwa khyndew ha kaba ka jylla Meghalaya ka la ioh haduh T.30.40 klur.

Kine ki jylla kiba la ioh ia kane ka song pisa ba la ai hapoh ka State Disaster Response Fund (SDRF) ki kynthup ia ka Assam kaba la ioh T. 375.60 klur, Manipur T.29.20 klur, Meghalaya T. 30.40 klur, Mizoram T.22.80 kur, Kerala T.153.20 klur bad Uttarakhand T.455.60 klur.

Kine ki jylla kiba la ioh pdiang ia kane ka song jingiarap ki dei kiba la shah ktah jur namar ka jingjur slap, ki jingshlei um bad ki jingtwa khyndew kiba la jia mynta u snem.

Ka Ministry of Home Affairs (MHA) ha u kyrwoh ka la ong ba hapoh ka jingialam jong u Myntri Rangbahduh Narendra Modi bad ka jingkdew lynti jong u Myntri kam pohiing u Amit Shah, ka Sorkar Pdeng ka don ia ka jingkut jingmut kaba skhem ban ai ia baroh ki lad jingiarap sha kito ki jylla kiba shah ktah na ka jingshah lyndhop ha ki bor ka mariang.

Mynta u snem ka Sorkar Pdeng ka la dep lypa ban pyllait ia ka song pisa kaba kot T.6,166.00 lyngba ka SDRF sha ki 14 tylli ki jylla, bad T.1,988.91 klur na ka NDRF sha ki 12 tylli ki jylla. Nalor kata ka la pyllait T.726.20 klur na ka State Disaster Mitigation Fund (SDMF) sha ki san tylli ki jylla bad T.17.55 na ka National Disaster Mitigation Fund (NDMF) sha ki artylli ki jylla.

Na ka liang ka Sorkar Pdeng ka la phah ruh haduh 104 tylli ki kynhun National Disaster Response Force (NDRF) sha ki 21 tylli ki Jylla bad Union Territories na ka bynta ki kam pyllait im bad aijingiarap.