Ioh ka Meghalaya 38 tylli ki skul EMRS; Ap jingmynjur ia 4 tylli ki CES: Rakkam

Syllad | The Rising MeghalayaMarch 13, 2025

U Myntri ka Tnad Pule Puthi u Rakkam A Sangma ha ka 12 tarik Lber u la pyntip ba ka Sorkar Pdeng ka la dep ban mang na ka bynta ban tei ia ki 38 tylli ki Eklavya Model Residential Schools (EMRS) hapoh ka Jylla.

“Ngi la tyrwa ban tei ia ki sawtylli ki Center of Excellence for Sports bad ngi dang ap ia ka jingmynjur na ka Sorkar Pdeng,” ong u Rakkam haba jubab ha ka kynta buh jingkylli.

Nalor kata u la pntip ba santylli na ki 38 tylli ki EMRS ki la iakynduh jingeh ha kaba iadei bad ka jingioh jaka, bad kine ki kynthup ia ka Laitkor Block, Mawryngkneng block, Mylliem block, Umsning block bad Laskein block.

Katkum ka jingpynpaw ka jong u, 16 tylli ki project ki la iaid shakhmat katba 7 tylli ki dang don hapdeng ka jingpynkhreh ia ka Detailed Project Report (DPR).

U Myntri u la pntip ruh ba haduh mynta ka jingtei ia ki artylli ki EMRS ha Samanda bad Pahamsyiem la lah ban pyndep. “Ngi dang pynbor ia ka Ministry ba kan sdang noh ban pyntreikam ia ki kloi katba lah,” u la ong.

Haba u MLA ka Mawryngkneng u Bah Heavingstone Kharpran u la kyntait ba kam don kano kano ka jingeh ha kaba iadei bad ka jaka ha Mawryngkneng namar na ka liang ka Dorbar Shnong ka la dep ai ia ka NOC bad ki ophisar ka tnad pule puthi ki la dep pynlong ia ka jingjurip, na ka liang u Myntri u la ong ba ka tnad ka dang ap ia ka kaiphot kaba pura ha kaba iadei bad kane kam.