Ïoh ka East Jaintia Hills ha ka sien kaba nyngkong ïa ki Lab ba ïadei bad ki metbneng

Syllad | The Rising MeghalayaFebruary 1, 2024

Ha ka sien kaba nyngkong duh ki bor pynïaid ha  ka distrik ki la lah ban plie  bad buh lai tylli ki Astronomy Lab ha lai tylli ki skul kiba don hapoh ka distrik. Kine ki lab ki don haduh 70 tylli ki jait tiar ba kynthup ka 6″ GSO Dobsonian Telescope. 

U Deputy Commissioner, East Jaintia Hills District, u Abhilash Baranwal ula pyntip ba ia kine ki lab la bei bad kyrshan da ka NETC  lyngba ka CSR, kine ki lab ki long kum ki jingpun jyngkieng ban nang pynshlur bad ai mynsiem ïa ki khynnah pule kiba    don ka jingsngewtynnad ba ïadei bad ka Astronomy (ki jingpule bniah bad ïadei bad ki metbneng) bad ka Science.

Kawei na kine ki Lab kaba la plie haka 1 tarik Rymphang ha Ambrose Memorial School, Khliehriat kaba la wan ban plie da u Myntri sorkar ka jylla u Ma Kyrmen Shylla ha ka jingdonlang u DC, ki khynnah skul bad ki dkhot nongtrei katei ka skul bad kumjuh ruh ki kmie ki kpa.

Ki artylli kiwei pat ki skul kiba lah buh kine ki lab ki kynthup ka Divine Words Secondary School, Lumshnong bad ka  Latyrke Secondary School.