Ioh jingmyntoi da ki spah ngut na ka Mega Health Camp kaba long North East Advetist University

Syllad | The Rising MeghalayaOctober 10, 2023

Da ki spah ngut ki paidbah naduh ki khunlung khynnah haduh kiba la san ki la ioh jingmyntoi lyngba ka ‘Free Mega Health Camp’ ba la khot pynlong da ka North East Adventist University, Khliehtyrshi, Thadlaskein West Jaintia Hills District haka sngi Ar ha ryngkat ka jingiatreilang bad ki tnat sorkar bapher bapher.

Kane ka dei ka sien kaba nyngkong ba la pynlong ia kaba kum kane ka jingai jingsumar kaba heh tam bad ka jingleh ia kiba bun tylli ki test kaba sted tam halor ki jait jingpang bapher bapher da kaba pyndonkam ia ka RT-PCR technology bad iarap ruh ban pynioh iaka jingsumar lyngba ki prokram jong sorkar.

Ha ka jingialang plie ia kane ka prokram la ioh ka jingkren na ka Kong DV Lyngdoh, Additional Deputy Commissioner West Jaintia Hills District, Dr Helen J Uriah, District Maternal and Child Health Officer, Health Department, WJH; Dr Brightstar Langbang, Block Development Officer, Thadlaskein; Shiva Sriram, Vice President ka Molbio Diagnostics; bad  Dr Darivianca E Laloo, General Manager ka Molbio Diagnostics.

Ka Dr. Helen, kala ong ba “Ka Thadlaskein block ka dei ka thain kaba ki duna shibun ha kaba iadei bad ki kam ai jingshakri ha ka liang ka koit ka khiah khamtam na ka bynta kito ki nongshong shnong kiba shong sha ki thain kiba kham pajih. Kane ka block ka dei ruh kaba duna tam halor ka jingdon jong kiba ai ia ki tika injek, ha kaba kiba bun na ki khynnah kiba ha ka rta 2-5 snem kim pat shym la ioh ia ka jingai tika injek halor u niangpyrsit ne measles Rubella vaccine na ka bynta shisien ne arsien.”

“Lah ban kdew ba baroh kito ki briew kiba la pynkhreh da ka ophis Block Development bad ki self-help group ki la iohlad ha kaba iadei bad ki lad jingsumar lyngba kane ka health camp,” ong ka Dr Helen J Uriah, Maternal and Child Health Officer, WJHD.

Naduh ki tnat sorkar, ki research institutions, university, private sector, non-governmental organisation, financial institution nalor kiwei pat ki la iasnohkti lang ban pynurlong ia kane ka jingthmu ba bha.

“Ia kaba kum kane ka prokram dei ban pynlong ha baroh ki bynta jong ka ri khnang ban lah ban pynpoi sha kiba bun ki briew katba lah bad ban pynjan ia ki lad jingsumar sha kiba pang ba shitom,” ong u Shiva Sriram, Vice President ka Molbio Diagnostics.

Ki kynhun kiba la iashim bynta lang ha kane ka health camp ki kynthup na ka  North Eastern Indira Gandhi Regional Institute of Health and Medical Sciences (NEIGRIHMS), Department of Health and Family Welfare, District Medical and Health Office, ki bor sorkar ka West Jaintia Hills lyngba ka Thadlaskein Block Officer bad ka Meghalaya State Rural Livelihoods Society -MSRLS , Community groups, International NGOs (Rotary Club of Jowai, Johns Hopkins Program for International Education in Gynaecology and Obstetrics- JHPIEGO, North East Slow Food and Agrobiodiversity Society – NESFAS), local NGOs (Grassroots – Shillong, Voluntary Health Association of Meghalaya – VHAM), Molbio Diagnostics, State-of-the-art screening bad kiwei.