Ioh jingkyrshan ka jingdawa kyntiew kyrdan iaka dispensary Padu sha ka PHC

Syllad | The Rising MeghalayaSeptember 7, 2020

Ka jingdawa ban kyntiew kyrdan iaka jaka sumar, ka Padu Dispensary sha ka Primary Health Centre kala nang ioh ka jingkyrshan na u paidbah nongshong shnong ka Padu bad ki shnong kiba shaniah ha kane ka jaka sumar kaba la rim bha ha Amlarem Sub-Division.

Ka FKJGP dang shen haka jingwan jurip u myntri ka koit ka khiah, Bah AL Hek kala ai da ka dorkhat ban pynkynmaw ia u halor ki jingdawa bala buh naduh u snem 2012 kaba u myntri ruh u kubur ba donkam ban pynbha ia baroh ki jaka sumar haka jylla.

Ka FKJGP War Jaintia haka 5 tarik une u nai kala khot jingialang ha Community Hall jong Community hall Padu Mawsku. La iadonlang ki waheh shnong bad Secretary shnong na ki 13 shnong kiba kynthup ia ka Padu bah, Padu Mawsku, Padu Mawjyllang, Khonglah, Nongbareh rim, Nongbareh Lyntiar, Ammutong, Mawlong, Pamshadong Shnong, Pamshadong Shmia Shyiang, Mawngap, Amkoi bad ka shnong Kudeng Rim. Nalor kine ki shnong la iadonlang ruh ki nongialam ka KSU bad HYNF

Ha kane ka jingialang hadien ka jingiathir sani bha la rai ban thaw da ka Joint Action Committee on Demand of Up Gradation of Padu State Dispensary to PHC. U Reachingson Kongwang un khlieh ia kane ka committee kum u Chairman, Stelin Mukhim kum u Secretary.

U Seilut Pohshna – Vice Chairman, Shlur Mukhim – Vice Chairman, Worsing Khonglah – Asst. Secretary, bah Lurman Talang – Joint Secretary, Dr. Arwind Khonglah – Adviser, Witness Pohtam – Adviser, Tarson Lymba – Adviser, kynthup ia baroh ia ki rangbah shnong bad Secretary na ki khatlai tylli ki shnong ki ban long ki executive member.

U Shlur Mukhim President ka FKJGP-WJC haba ai jingkren u la iathuh ba kane ka state  Dispensary kaba lah jan dap da ki sanphew snem ka rta, ka long kaba lah shah ieh khunswet lah slem ha ki bor ba dei khmih bad ka long ruh sa tang kane kawei hapoh ri kum Jaintia kaba ym pat shym la kyntiew kyrdan satia haduh mynta. Ula ong kala dei ka por iaka sorkar bad ki nongmihkhmat ban phai khmat ban kyntiew kyrdan ia kane ka jaka sumar bad ban pynbiang iaki jingdonkam baroh ban myntoi ka thain.