Ioh jingithuh ka nongshna phlim Pnar ba paw na ka Rotary Club Jowai

Syllad | The Rising MeghalayaMay 17, 2025

Ka Rotary Club Jowai ka la ai burom kyrpang ia kawei na ki kynthei ba la trei shitom bad ba la long ka nuksa ha ka kam shna phlim ha ka ktien Pnar, ka Kong Simi Khongtiang, da ka khusnam Vocational Excellence Award ha ka jingïalang ba kyrpang kaba la tip kum ka Felicitation Ceremony, kaba la long ha hall ka Infinity Restaurant, Mooralong, Ladthadlaboh Jowai ha ka janmiet 16 tarik Jymmang.

Ka Kong Simi Khongtiang, kala sdang ia ka jingtrei ha ka kam shna phlim naduh u snem 2007, ka la ioh jingithuh halor ka jingtrei shitom jong ka ban kyntiew ia ka ktien, ka riti ka dustur bad iaki sap ki phong jong ka jaidbynriew Pnar lyngba ka camera bad ki dur. Ka la pawkhmat ha ka thup ki nongshna phlim ha Rilum Jaintia lyngba ka phlim Da Theh Lut – kaba la wanrah ruh ka nam bad burom lyngba ka khusnam Best Script Writer ha ka jylla ha u snem 2013.

“Haba ngi jied ban trei ia ka kam kaba ngi ieit bad ngi aiti lut ialade ha ka, ngi kylla long ki kynrad ym ki mraw,” la ong ka Kong Simi haba kren haka jingpdiang iaka kane ka khusnam.

Ka Rotary ha kane ka janmiet kala pynkup burom ruh iaki 6 ngut kiwei pat ki dkhot jong ka haka jingiadonlang u kongsan u Rajesh Batra, Assistant Governor Zone 9 uba la ong, “Ka ieng haka nongrim ban shakri na ka bynta bha ka miat jong ka imlang sahlang bad ka pyniajan ruh bad ki briew kiba na kiwei ki ri jong ka pyrthei.”

Iaka jingialang pynkup burom la pyniaid da u Rotarian Mewothi Gatphoh Sergeant at Arms bad la ioh ka jingkren pdiang na u Rotarian Rudolf Eustace Laloo PHF, President, bad la ai iaki kyntien ai khublei da u Rotarian M Passah MPHF.