Ioh jinghikai ka shnong Mooshrot halor ka shongkha khynnah bad POCSO Act

Syllad | The Rising MeghalayaJuly 20, 2025

Ka Village Health Council ka shnong Mooshrot ha ka jingiatreilang bad ka Barato Outpost (OP) bad ka Laskein CHC ha ka 19 tarik Naitung ki la pynlong ia ka prokram pynshai paidbah halor ka kam shongkha khynnah ne Child Marriage bad ka ain POCSO ban pynsngewthuh sha ki nongshong shnong halor ki kyndon ain bad ka jingkongsan ban ai jingiada ia ki khynnah na ki kam shah thombor bad na ka shongkha khynnah.

Ha kane ka prokram ba la pynlong hapoh ka shnong Mooshrot, West Jaintia Hlls la ioh ka jingkren na u SI Wilfred Jala, Officer incharge Barato Police Outpost halor ki mat kiba iadei bad ka shongkha khynnah bad halor ka ain Protection of Children from Sexual Offence (POCSO) Act.

Ula pynshai ruh halor ki jingktah na ka shongkha khynnah ha kaba iadei bad ka koit ka khiah jong ki khun ki kti, ka pule puthi bad ka bha ka miat da kaba ban jur ba kadei ka kam kaba beain kaba hap ha ka jingshah pynshitom katkum ka ain.

Ka Kong M Papiah, Counsellor, Adolescent friendly Health Clinic, Laskein CHC ka la kren halor ki jingma kiba shyrkhei kiba lah ban mih na ka shongkha khynnah da kaba batai ba ka kam shongkha ha ka rta kaba dang khynnah ka lah ban pynthut ia ka jingheh jingsan bad ka koit ka khiah jong i khunlung.

Ka la kdew ruh ba ka jingkhie samla ha ki khynnah kynthei ka sdang hapdeng ka rta 9 bad 13 snem rta, hynrei ka jingkylla ka nangbteng shuh shuh haduh ban da kynjoh hapdeng ka 15 bad 18 snem rta.

Ka la pynpaw ha ha kaba kum kane ka rta ki khynnah samla ki mad ia ki jingkylla ha ka jingsngew, ka jingroi ha ka jinglong laitluid, ka jingkylla ha ki jingmut jingpyrkhat.

Nalor kata ka la ban jur ba ka kam shongkha hapdeng kine ki jinglong jingman ka lah ban ktah jur ia ka bor pyrkhat pyrdain, kan khanglad ia ka pule puthi bad ia ki lad ki kabu ha ki kam ki jam bad kyntiew ia ka jingma na ka jinglah ban armet kloi bad buh ia ka jingma kaba khraw ia ka koit ka khiah.

Shibynta jong kane ka prokram la pynlong ruh ia ki jingialehkai kum ka skit bad phutbol kaba la pynshit rhem ia ki paidbah nongshong shnong.

Kiwei pat pat kiba la aijingkren ha kane ka prokram ki kynthup ia u Rangbah Shnong u Bah Janai Suchaing, Chairman VHC Kong B Lathong, Community Gender Heath Activist (CGHA) Kong Amelia Lyngdoh kaba la pynshlur ia ka jingiatreilang hapdeng ki nongshong shnong ban khanglad ia ka kam shongkha khynnah bad ban kyntiew ia ka bha ka miat jong ki khynnah kiba dang khie dang san.