Ioh Gold Medal ka samla Jowai ha ka MBA programme napoh Assam Don Bosco University

Syllad | The Rising MeghalayaSeptember 24, 2023

Ka samla Dorothy Roy Tariang, kaba dei na sor Jowai, Jaintia Hills ka la ioh pdiang ia ka Gold Medal namar ka jingwan ha ka kyrdan kaba hakhmat eh (Topper) ha ka MBA programme jong ka Assam Don Bosco University, kata da kaba ioh heh tam haba shim haba khein ia ka Cumulative Grade Point Average (CGPA) kaba long 9.29 na ka 10.0.

Ka Dorothy ka dei ka khun jong I Dr. (Mrs) Iwbih Nylla Tariang, Senior Veterinary Officer bad u Journalist u Dr. Anirban Roy kiba shon ba sah ha Mynthong, Jowai. Ka Dorothy Roy Tariang ka la pyntbit ia lade ha ka jingpule Human Resource Management. Kane ka dei ka sien kaba nyngkong ba ka khynnah pule na ka jylla Meghalaya kan ioh ia kane ka kyrdan topper ha ka MBA programme jong ka Assam Don Bosco University.

Ka Dorothy ka la ioh pdiang ia kane ka Gold Medal ha ka Convocation kaba 12 jong ka Assam Don Bosco University kaba la long hynnin ka janmiet sngi Saitjain hapoh Tapesia campus hajan ka nongbah Guwahati.

Namar ka jingkmen halor kane ka jingjop kaba khraw, ka samla Dorothy ka la ong ba ka don ia ka jingthrang ban trei na ka bynta ban kyntiew ia ka bha ka miat bad ka roi ka par jong ki nongshong shnong ka jylla Meghalaya.

Haba ba kan leit pyniasoh ha ka MBA programme hapoh katei ka University, ka Dorothy ka la pyndep ia ka graduation ha ka English Literature napoh Amity University.

Ha katei ka jingialang pynkup burom la ia don lang ruh u Lat ka Assam u Gulab Chand Kataria uba dei ruh u Visitor jong ka Assam Don Bosco University uba la sam ruh ia ka khusnam sha kiba wan ha ki kyrdan kiba shakhmat eh bad iashim bynta ha kaba aijingkren ha kane ka prokram.

Kiwei pat kiba la aijingkren ha kane ka prokram ki kynthup ia Chancellor ka Assam Don Bosco University, u Fr. Januarius Sangma, u Vice Chancellor ka  University, u Fr. (Dr) Jose Palely bad kiwei.