Ioh GI Tag ki jain Ryndia bad jain thain kti ba la pynmih na ka Jylla Meghalaya

Syllad | The Rising MeghalayaApril 3, 2025

Kan long da shisha ka jingsngew sarong bad ka jingjop kaba khraw na ka bynta ka jylla Meghalaya hadien ba ki jain Ryndia bad ki jain thain kti ba la pynmih na ka jylla ki la ioh ia ka jingithuh bad jingmynjur ban ioh ia ka Geographical Indication (GI) tag ne ka shap na ka Sorkar India ia kaba la pynbna da ka GI Authority, Registrar Geographical Indications hapoh ka Intellectual Property Office,

Ia kaba la pynmih ruh ha ka official website jong ka GI Authority.  

Ka Tnad Textile ka Sorkar Jylla ka la pynskhem bad shimkhia ha ka jingtreikam baroh kawei da ka jingkyrshan jong ka NABARD bad na u riew shemphang ka GI u Dr. Rajnikanth kiba la iarap ban pynbit pynbiang bad aijingkyrshan halor ka jingaplai ryngkat lang jong ka Tnad Textile bad ka Meghalaya Ryndia Producers Association ban ioh ia ka GI Tag naduh kine ki saw snem kiba la dep.

Kane ka jingiaid lynti ka dei kaba la shim da ka Tnad Textile tang hadien khyndiat por ba la pynbna ia ka shnong Umden-Diwon kum ka Eri Silk Village kaba nyngkong eh ha ka jylla ha ka 12 tarik u Rymphang 2021.

Na ka liang u Principal Secretary ka Tnad Textile, u Bah Frederick Roy Kharkongor IAS, u la ialam ia ka kynhun kaba kynthup ia ki ophisar na ka Tnad Textile, ki dkhot na ka Meghalaya Ryndia Producers Association bad ki nongthain kti ba pawkhmat na Silk Village ban kyrshan borbah na ka bynta ban aplai ia ka GI Tag ha ka jingialang kaba khatduh jong ka Consultative GI Group ba la khot pynlong da ka ophis jong ka Geographical Indications Registry ka Sorkar India ha Kolkata ha ka 20 tarik u Naiwieng 2024.

Kine ki jingtrei borbah ban ioh ia kane ka jingithuh na ka bynta ki jain Ryndia bad ki jain thain kti ba la pynmih na Meghalaya ki la wan long ruh ha ryngkat ka jingiohi jngai jong u Myntri Rangbah ka Jylla u Conrad K Sangma kumjuh u Myntri ka Tnad Textile u Bah Paul Lyngdoh ban kyntiew shuh shuh ia ka kolshor kaba hiar pateng jong ka jylla bad ban kyntiew ia ka Brand Meghalaya lyngba ki mar kiba la shna kyrpang ba la pynmih na ka jylla Meghalaya hapoh ka ri bad shabar jong ka ri kumjuh.