Ioh bat ka VDP Muktapur shi kali u kwai Supari ba wan poi na Bangaldesh, kem 5 ngut ki briew

Syllad | The Rising MeghalayaJuly 19, 2020

Ka Village Defence Party (VDP) jong ka shnong Muktapur ka shnong kaba hap ha Amlarem Sub Division, West Jaintia Hills District kala ioh bat shi kali u kwai tyrkhong ne u supari bad kala ioh kem ruh 5 ngut ki briew kiba suba donkti ban khaii beian ha khappud India Bangladesh.

Ka dorbar shnong jong ka Muktapur kala mudui da ka jingujor ejahar ha khmat ki Pulit jong ka Muktapur Patrolling Post haka sngi U Blei pyrshah ia ki san ngut ki briew kiba kynthup ia u Donbok Buam uba na ka shnong Umladkhur,  January Shylla uba na Trangblang bad 3 ngut kiwei pat ki nongtrei ne nongbud jong ki.

Katkum ka ka ejahar kaba la mudui ka Dorbar Shnong Muktapur ba ki VDP shnong Muktapur kiba ap pahara kila ioh bat ia kawei ka ka kali Mahindra Bolero Pick kaba don u register number ML 04C 5805 haka por 3:30 Am haka Sngi U Blei bad kila ioh kem ruh ia u trai kali bad trai kwai uba la tip kum u Donbok Buam, January Shylla bad ki 3 ngut ki nongbud jong ki.

La iathuh ba ki VDP jong ka shnong Muktapur kila pynsangeh iaka kali, hynrei kine ki briew kila ialeh pyrshah bad ktah kti ruh iaki VDP namar ba ki duna paid. Ki VDP shnong mar mar kila pyntip sha ki para VDP bad kila bat iaka kali bad kem ia kine ki briew.

La iathuh ba une u mar ne u kwai bala ioh kurup na kane ka kali um duna iaka 50 phew byrni.

Une u mar ne kwai ba iaid iew bha ula wan poi na Bangladesh lyngba ka Wah Lakroh bad thmu ban shalan tuh sha Assam bad kiwei kiwei ki jylla.

“Kane ka jingleh jong kine ki briew ka dei ka kam tuh kam beaiñ bad kila pynkhein ruh iaki kyndon ban iakhun pyrshah iaka khlam COVID-19,” ong ka VDP shnong Muktapur bad kila dawa naka bor jong ka aiñ ban pynshitom ia kine ki briew katkum ka kyndon kam khaii beaiñ, ka Disaster Management Act namar ba ki buh jingma iaka ri na ka khlam COVID-19.

Ki Pulit kila register iaka case bad ka jingtohkit kala iaid shakhmat.