Ioh bat ka HYC ia ka kali kit masi, dawa pynshitom ia kiba kit beain sha Jylla

Syllad | The Rising MeghalayaJuly 5, 2025

Ka Hynniewtrep Youth Council (HYC) hadien ka jingioh bat ia kawei ka kali kit masi beain kaba thmu ban wan rung sha ka Jylla ha ka jaka talasi ha Byrnihat Ri Bhoi District ha ka 30 tarik u Jylliew kala dawa ban pynshitom ia kiba kit beain iaki jingri shapoh Jylla.

Ka HYC haka sngi Thohdieng kala ai ujor ruh sha ka Director Animal Husbandry & Veterinary Department, ka Dr. M Kharshandi ban kyntu ban pynthikna ba ka jingkit iaki jingri dei ban long katkum ki kyndon jong ka ain.

U President ka HYC u Bah Roykupar Synrem u la ong ba ha katei sngi ka seng ka la hiar sha katei ka jaka talasi ban peit ia ka jingwan rung beain jong ki briew kiba na bar hynrei ka la ioh bat pynban ia kawei ka kali kaba don ia u nombor AS 01 RC 7779 kaba kit haduh khyndai tylli ki masi ia kiba la shu thynnian bad khlem da don satia ia ki kot ki sla kiba biang.

Kine ki jingri kim don ruh iaki syrnot ban pynthikna iaka jinglong jingman jong kine ki jingri la ki long ne em kiba biang ban bam da ki briew.

U Bah Roykupar u la ong ruh ba ka rukom kit ia kine ki Masi ka long pyrshah ia ki kyndon jong ka Prevention of Cruelty to Animals Act, 1960, ka Transport of Animal Rules, 1978 (ba la pynkylla) bad ia ka Motor Vehicles Act, 1988.

“Ngim lah sngewthuh kumno la shah ban kit ia kine ki jingri ha kane ka rukom kaba tohmet hapoh ka jylla khlem da bud ryntih ia kitei ki kyndon ain kiba khang pyrshah ia kiba kum kine ki jingleh kiba beain,” ong u nongialam ka seng da kaba ban jur halor ka jingdonkam ban bud ryntih ia ki kyndon kiba iadei bad ka jingkit bad shalan ia ki jingri.