Ioh bat biang ka Mawlai SC ia ka nam lahduh ha ka lympung ialehkai Shillong Premier League

Syllad | The Rising MeghalayaMay 11, 2024

Ka Mawlai SC ka la ioh ban bat biang ia ka kyrdan kaba nyngkong ha ka lympung ialehkai Shillong Premier League 2023-24 da kaba pynliem noh ia ka Rangdajied United FC da 1-0 ha ka jingialehkai Final kaba la long ha ka 11 tarik mynta u bnai ha Madan SSA, First Ground, Polo ha ryngkat ka jingsakhi jong ki hajar ngut ki paidbah.

Kane ka jingjop ka la wan long lyngba ka shi kol kaba u Donald Diengdoh u la ioh ban khyrwit tyngeh da ka khlieh ha ka minit kaba  26, kata ha kaba ka Mawlai ka la lah ban ialehkai bha mar ia sdang ka jingialehkai ha ka kylla step.

Hynrei haba bteng ia ka jingialehkai ha ka kylla miet, ka Rangdajied ka la lah ban banbor tyngeh bad ialehkai shiteng tang shiteng madan ha ka jingpyrshang ban ioh lad ban pynphai, hynrei namar ka jingkyrshan dohiap jong ki rangialehkai dien ka Mawlai bad ka jingtbit jong u kol kam shym la lah ban thaw pyrthei wat hadien ba ka la ioh buntylli ki kabu bad kumta ka la hap ban mad ia ka nam rem.

Lyngba kane ka jingjop ka Mawlai ka la ioh ban rah ia ka trophy nalor ka song pisa kaba long T. 3lak katba ka Rangdajied ka la ioh ia ka song pisa kaba T.1.5 lak ha ryngkat ka trophy ia kaba la sam da u Kongsan ha kane ka sngi uba dei u Chief Secretary ka Jylla, u Bah DP Wahlang bad lyngba u Chief Engineer ka State Sports Council ka Jylla u Bah BM Syiem ha ryngkat ka jingiadon lang u president ka Meghalaya Football Association u Bah H Dohling, u president ka Shillong Sports Association u Bah Eugeneson Lyngdoh nalor kiwei kiwei pat ki heh ka SSA.

Lah ban kdew ba ka Mawlai ka dei ruh ka kynhun kaba la ioh ban rah ia ka nam lahduh ha ka lympung ialehkai SPL 2022-23 katba ka Rangdajied ka la ioh ban bat khatduh ia kane ka nam naduh u snem 2013.