India, Bangladesh AFC Asian Cup qualifier: Kut da kaba iasam point ba iakhaid

Syllad | The Rising MeghalayaMarch 26, 2025

Ka jingiakhun hapdeng ka India bad ka Bangladesh na ka bynta ka AFC Asian Cup 2027 Qualifiers ka la kut noh ha ka jingiakhad da 0-0 ha ka 25 tarik Lber ha JN Stadium, Polo, Shillong.

Haduh palat 14,900 ngut ki paidbah nongkyrshan ki la tuid sha JN Stadium, Polo ban sakhi ia kane ka jingialehkai ha kaba la ia don lang ruh u Myntri Rangbah ka Jylla u Conrad K Sangma kumjuh u Secretary General ka All India Football Federation u Anilkumar P bad u President ka Meghalaya Football Association u Bah Hamletson Dohling.

Na ka liang u head coach ka India u Manolo Márquez u la pynmih bujli haduh san ngut ki nongialehkai na ka kynhun kaba la pynliem ia ka Maldives ha ka jingialehkai paralok kaba la long ha ka taiew ba la dep da kaba wanrah ia u Boris Singh Thangjam, Udanta Singh Kumam, Lalengmawia Ralte, Sandesh Jhingan bad u Farukh Choudhary ha kaba la pynkhamti ruh ha u Sandesh kum u kapten ka kynhun.

Hynrei, ka Bangladesh mar ia sdang ka jingialehkai ka la ioh ia ka kabu tang hapoh khyndiat sekhon ban khyrwit sha kol hadien ba u rang ap kol ka India u Vishal Kaith u la shu ai ia ka bol kaba la leit poi beit beit pynban sha u Md Mojibor Jony, hynrei donbok ba kane ka bol ba la shut da une u midfielder kam shym rung satia shapoh ka kol.

Sa kawei pat ka kabu na ka bynta ka Bangladesh ka la wan long hadien ba u Md Shakil Topu u la cross ia ka bol sha u Md Shariar Emon uba la khyrwit da ka khlieh hynrei ka bol ka la her shalor jong ka kol.

Ha ki 15 minit jong ka jingialehkai ka Bangladesh ka la pynklumar jingmut ia ki rangialehkai dien jong ka Blue Tigers, bad katba u Emon u dang bteng ban pynsyier. Sa kawei pat ka jingbakla jong u rang ap kol ka India ka la buh jingma na ka jingshah thep, hynrei u Subhasish Bose u la ioh ban shut noh sharud.

Hynrei ka jingialehkai ka la sdang ban kylla ha kaba ka India ka la sdang ban ialehkai bha ha kaba u Liston Colaco u la ioh ia ka lad ban tynjuh ia u rang ap kol ka Bangladesh u Mitul Marma hynrei namar ka bol kam dei kaba sted bad jam kumta u la lah ban iada da kaba suk.

Haba wanphai sha ka kylla miet, u Colaco u la bteng ban ialehkai bha bad ha ka minit kaba 54 u la ioh ban pashat ia ka bol sha u Sunit Shhetri, hynrei kam shym la seisoh namar um shym la ioh lad bha ha ka rukom kaba biang. Na ka liang ki rangialehkai ka India ki la pyrshang borbah ban ioh ia ka lad ban pynkhih jar hynrei kane kam shym la seisoh bad ha kaba kut ka jingiakhun ka la poi sha ka jingiakhaid.