Iatreilang ki Pulit, ASHA bad ka tnad Koit ka Khiah ban tem iaka jingshah thombor ki kynthei khynnah ha Bakur

Syllad | The Rising MeghalayaAugust 24, 2025

Ka Dawki Police Station haka jingïatreilang bad ki ASHA Workers bad ka Health Department ki la pynlong iaka prokram pynsngewthuh ban iakhun pyrshah iaki kam thombor pyrshah iaki kynthei kynthei kaba long ha iew Lamin Bazar, Bakur, hapoh Amlarem Block, West Jaintia Hills District.

Ia kane ka jingai jinghikai la pynlong haka 19 tarik Nailar kaba la shimbynta da ki pulit, ki doktor, ki nongtrei ka koit ka khiah, ki ASHA bad ki nongïalam shnong kiba wan ban pyni ïa ka jingïatylli ban pynneh ïa ka jingshngaiñ jong ki kynthei ha ki shnong nongkyndong bad ki jaka khappud.

Ia ka jingïalang la pynïaid da u Sub-Inspector JK Majaw na Dawki Police Station uba la khot iaka jingdonkam ban ïatreilang bad ki paidbah ban tehlakam ïa ki kam thombor pyrshah ïa ki kynthei. U la ong ba Dawki kum ka shnong khappud ka don haka jingma na ka jingkhaii beain, ka jingwan phrung tuh kaba dawa iaka imlang ka sahlang ban iatreilang ban ai jingtip mar mar sha ki pulit lada don kino kino ki kam beain.

Ka ASHA Facilitator H Swer na Mukhtapur Sub-Center ka la kren halor ka jingdonkam ban pynkhlaiñ ïa ka jingtip paidbah bad ki lad jingsumar bad kyntu iaki lanot ba kim dei ban sngap jar jar ha kaba iadei bad kino kno ki kam thombor iaki kynthei khynnah.

Ka WPSI R Suchiang ka la kren halor ka jingshngaiñ jong ki kynthei, ka bynta jong ki pulit bad ka jingdonkam ban wanrah ka jingiadei kaba jan hadpeng ki pulit bad ki nongshong shnong ban don ka jingsngew skhem.

U Dr. S Khonglah na Dawki PHC u la kren halor ki lad jingsumar, ka jingshitom haka bor pyrkhat bad kumno ban iarap iaki lanot, katba u Dr. E. Khonglah na Pdengshakhap PHC ula kdew halor ka jingdonkam kyrkieh ban pynioh iaki lad jingsumar bad ban ai ka jingkyrshan iaki lanot

Kiwei kiwei kiba kren ki kynthup iaka ASHA Baiahunlhang Khongsdier na Dawki, Secretary jong ka B. Lamin-Darrang Sub-Center bad ka shnong Bakur, L. Manner, u Secretary ka shnong Lamin F. Dkhar, Waheh Shnong Dawki bad ka jingai khublei la ioh na u Sub-Inspector D.B.B Tyngkan.