Iatreilang Assam-Meghalaya ban pynneh ia ka suk ka sain ha khappud: CM

Syllad | The Rising MeghalayaApril 4, 2025

Ka Sorkar Assam bad ka Meghalaya ki la shimkhia ha kaba iadei bad ki kam iakajia pud ha kaba ki la shim ruh ia ki lad ki lynti ban pynneh pynsah ia ka shongsuk shongshngain ha baroh ki jaka khappud hapdeng ki ar jylla.

Ia kane la pynpaw da u Myntri Rangbah ka Jylla u Conrad K. Sangma ha ka 3 tarik Iaiong haba iashim bynta ha ka jingrakhe Golden Jubilee jong ka All Meghalaya Karbi Association (AMKA) ha ka shnong Purduwa Kharpati, Ri Bhoi District.

U CM u la ong ruh halor ki kam iakajia pud na ka liang ka sorkar Assam bad Meghalaya kumjuh ka Karbi Anglong Autonomous Council (KAAC) ki la iatreilang ryngkat ryngkat ban pynthikna ban pynneh ia ka jingsuk ha ki jaka khappud.

U la ong ruh ba ym don skul satia ha kito ki jaka ba don ka jingiakajia pud bad ki khynnah ki hap ban pule kot ha trai dieng lane ha ka iingbriew, hynrei da ka jingiatreilang bad ka Assam kumjuh bad ka KAAC ka Meghalaya ka la lah ban aijingkyrshan ban tei ia ka iingskul ha kawei na kine ki jaka. Ia kane ka skul la tei na ka pisa lyngba ka Chief Minister Special Development Fund (CMSDF).

“Ki don bun ki jaka ha kaba ka sorkar ka la iatreilang ban pynthikna ia ka roi ka par kaba ki paidbah ki dei hok ban ioh. Ki jingeh ki don bad kin iai don beit, hynrei na ka liang ka sorkar ka la trei shitom na ka bynta ban pynbeit ia kine ki jingeh,” u la ong.

Halor ki jingeh kiba ki nongshong shnong kiba shong ba sah ha ki thain khappud ka Assam-Meghalaya ki iakynduh, u CM u pyntip ba na ka liang ki ar sorkar kynthup ia ka KAAC ki la iatreilang ryngkat ryngkat ban pynbeit ia kine ki jingeh.

“Kiei kiei ki la iaid shakhmat ha ka lynti kaba dei. To ngin bteng ban aiti lut na ka bynta la ki jong ki briew. Ai ba ngin sngewthuh ia ka jingeh kaba ki paidbah ki iaid lyngba bad ngi lah ban long ki atiar na ka bynta ban weng ia ki jingeh kiba iadei bad u pud u sam. Kam dei ka mat kaba suk ban pynbeit, bad ka dei ka jingeh na ka bynta ki bor sain hima sima. Nga ai khublei ia ka sorkar Assam halor ka jingshim ia ki sienjam ban pynbeit ia kane ka jingeh,” u la bynrap.

Halor ka jingdawa ba la wanrah da ka AMKA ban pynkylla noh ia ka rukom ai kyrteng ia ki Karbi na ki Mikir ha ka jylla, u CM u la ong, “Nga la tip halor kane ka mat kaba iadei bad ka rukom ai kyrteng. Ka dei ka mat kaba eh ia kaba dei ban shim ha ka kyrdan kaba hakhliehduh. Watla katta ka jingtreikam ka la sdang bad ngi la thaw ia ka committee ba la khlieh da u Commissioner Secretary ka Tnad Social Welfare ban khmih ruh halor kiwei kiwei pat ki jingdawa jong jaidbynriew rit paid bapher bapher ka jylla. Ka Committee kan pule bniah bad aijingmut bad rah sha ka sorkar India.”