Iasoi MoU ka NRAI, ka SAM bad ka tnad Sport ban kyntiew ia ka kam ialehkai siat suloi haka Jylla

Syllad | The Rising MeghalayaJuly 8, 2025

Ha ka sienjam kaba thmu ban kyntiew ia ka kam ialehkai siat suloi ha ka Jylla Meghalaya, ka Shooting Association of Meghalaya ha ryngkat ka Tnad Sports ka Jylla haka 8 tarik Naitung ki la iasoi ia ka Memorandum of Understanding (MoU) bad ka National Rifle Association of India (NRAI).

Ia kane ka soskular la iasoi hapdeng u President ka SAM u Bah John F Kharshiing, u DD Shira, MCS, Director ka Tnad Sports bad u Secretary General ka NRAI u K Sultan Singh, ha ka jingiadonlang u Myntri Rangbah ka Jylla u Conrad K Sangma, u President ka NRAI u Kalikesh Narayan Singh Deo nalor kiwei pat.

Kane ka jingiasoi soskular ka thmu ban plie ia ki lad ki lynti ban shna ia ki jingtei kiba iadei bad kane ka jingialehkai siat suloi ha Meghalaya kiba ia ryngkat dor bad kiwei pat ki jaka siat suloi ha ka pyrthei, ban pyntreikam ia ki prokram aijinghikai bad ban ithuh bad ban saindur ia ki sap ki phong naduh ki kyrdan kiba hapoh haduh kiba hakhliehduh. Kane ka pynpaw ruh ia ka jingkut jingmut ban pynlong ia ka Meghalaya kum kawei na ki jaka ialehkai siat suloi kaba pawkhmat hapoh ka ri bad ka pyrthei

Ka jingthmu jong kane ka soskular ka long ban shim ia ki sienjam ban shna ia ki jingtei ne jaka iasiat suloi katkum ka standard jong ki jaka iasiat ka pyrthei hapoh Meghalaya, ban pyntreikam ia ki prokram ai jinghikai bad coaching, ban ithuh bad saindur ia ka sap naduh ki khynnah haduh ki nongsiat suloi. Ka dei ruh shibynta na ka jingkut jingmut ban pynlong ia ka Meghalaya kum kawei na ki jaka ialehkai siat suloi hapoh ka Ri bad ka pyrthei.

Haba kren ha ka jingialang u Myntri Rangbah ka Jylla u Conrad K Sangma u la pdiang sngewbha ia kane ka sienjam da kaba ong, “Kane ka jingiatreilang ka kdew ia ka lynti kaba thymmai ha ka histori ki kam ialehkai sports ha Meghalaya. Ngi sngew sarong ban ioh iatreilang bad ka NRAI ban pynkupbor ia ki samla jong ngi ba kin don ia ka jingangnud kaba kham khraw ha kane ka jingialehkai siat suloi.”

U President ka NRAI u Kalikesh Narayan Singh Deo ha ka jingkren u la iaroh ia ka rukom pyrkhat kaba beit ba la shim da ka sorkar Meghalaya da kaba ong, “Ka thain Shatei Lammihngi ka dei kaba don kyrhai ia ki sap ki phong ha ki kam sports. Kane ka jingiatreilang kan tei ia ka nongrim na ka bynta ka Meghalaya ba kan kylla long ka jaka ialehkai siat suloi kaba paw bha ha ki snem ki ban wan.”

Nalor kata u la ong ruh ba katkum ka MoU, ka NRAI kan pynlong ia kawei ka Open India Championship man la u snem ka ban kyntiew shuh shuh ia ka ioh ka kot jong ka Meghalaya namar haduh palat 4000 ngut ki nongialehkai siat suloi kin wan iashim bynta na ka bynta shi bnai kynthih da kaba pynlut na lade ia ki jinglut jingsep baroh.

Ka MoU ka kdew ia ki jingkitkhlieh ryngkat lang ha kaba iadei bad ka jingshna ia ki jingtei, ka jingai jinghikai, ka jingpynioh ia ki tiar ki tar bad ka jingpynlong ia ki jingiakop siat suloi kiba hadien habud hapoh ka jylla, bad la khmih lynti ba kane kan long ruh kum ka nuksa na ka bynta kiwei pat ki jylla ba kin bud ia kane ka sienjam.