Iasoi MoU ka Meghalaya bad ka Asean One Japan ban kyrshan lad ioh kam ia ki samla shabar ri

Syllad | The Rising MeghalayaSeptember 6, 2025

Ka Sorkar Meghalaya lyngba ka Meghalaya State Skill Development Society (MSSDS) ka la iasoi ia ka Memorandum of Understanding (MoU) bad ka Asean One Co. Ltd, Japan ha ka 5 tarik Nailur ha Tokyo ban kyrshan ia ki jinghikai ban aikam ia ki samla na kane ka jylla shabar jong ka ri.

Kane ka MoU ba la iasoi hapdeng ki ophisar na ka MSSDS bad ka Asean One Co. Ltd, Japan ka dei kaba la mih lyngba ka jingleit jurip da u Myntri Rangbah ka Jylla sha Japan ha u bnai Iaiong 2025, na ka bynta ban thaw ia ki lad ioh kam ioh jam na ka bynta ki samla ka jylla Meghalaya.

Kane ka jingiatreilang kan pynleit jingmut ban plie ia ki lad iohkam ioh jam ha ka liang ka koit ka khiah, hospitality, IT bad kiwei pat ki bynta bad ka jingdonkam jong ka ri Japan ka ban ai ia ka jinghikai ia ka ktien Japan bad kumjuh ha kaba iadei bad ka kolshor. Kan ai ruh ka jingkyrshan halor ki jinghikai bad ka jingpynrung kam shabar ri ia ki samla na Meghalaya ban sdang lyngba ki 500 ngut ki samla ha ka snem ba nyngkong bad ka ban kiew sha ka ka 5000 ngut ha ki san snem ki ban wan.

Haba kren ha ka Indian Embassy ha Tokyo, u Myntri ka Tnad Labour Employment & Skill Development, u Bah Shakliar Wajri u la ong, “Kane ka MoU kam dei tang ka jingiateh kular hynrei ka dei ka jingplie lad plie lynti ia ki khun samla ban ioh kam shabar jong ka ri bad kumjuh ban tip ia ka riti dustur hapdeng ka jylla Meghalaya ba ka ri Japan.”

Ka Asean One Japan ba la ialam da u Chairman bad CEO u Toshiaki Nishikawa dang shen u la iakynduh ia u Myntri Rangbahduh ka India u Narendra Modi ha ka por ba pynlong ia ka 15th India–Japan Annual Summit ha Tokyo ha ka 29-30 tarik Nailar 2025, da kaba pynpaw ia ka jingiahap ia kane ka jingthmu jong u Myntri Rangbahduh ban pynlong ia ka INdia kum ka Global Skill Hub.

Kane ka jingiasoi MoU ka pynpaw ia ka jingkut jingmut jong ka sorkar Meghalaya bad ka Asean One Japan ban shim ia ka sienjam kiba lah ban neh ha ka liang ka ioh kam ioh jam bad ka jingpynkup bor ia ki samla bad ka jingpynkhlain ia ka jingiatreilang hapdeng ka India bad ka Japan.