Ïasoi MoU hadpeng ka NIFT bad ka NEHHDC ban kyntiew ïaka kam pynmih jaiñ bad ki tiar shna kti
Ka National Institute of Fashion Technology (NIFT) Shillong, ka la ïa soi ïa ka Memorandum of Understanding (MoU) bad ka North Eastern Handicrafts and Handlooms Development Corporation Limited (NEHHDC) jong ka tnat Development of North Eastern Region (DoNER), ka Sorkar India. Kane ka MoU ka long u mawjam ban sah jingkynmaw ha kane ka bynta ka NIFT kaba dei ka shlem pule hapoh ka tnat Ministry of Textiles jong ka Sorkar India bad ka dei ka jaka pule kaba nyngkong eh ha ka ri ban ai jinghikai shaphang ka lain pule ha ka riam ka beit bad ka jingpynïaid ïew ïa ki.
La seng ia ka NIFT Shillong ha u snem 2008 bad ka dei ka jaka pule kaba nyngkong eh ha ka thaiñ Shatei Lam Mihngi ban ai jinghikai ïa ki samla ha kane ka bynta. Kum ka jaka pule ha ka riam ka beit, ka NIFT Shillong ka don ïa ka thong ban kyntiew ïa ki kam bad ki jingtrei kti ha ka jingpynmih ïa ki jain, ki riam ki beit bad ki tiar shna kti.
La seng ïa ka NEHHDC ha u snem 1977 da ka jingthmu ban pynroi bad kyntiew ïa ki kam thaiñ jain bad tiar shna kti na kane ka thaiñ da kaba ïarap ban pynïaid ïew ïa kine ki tiar bad ban kyntiew ïa ka ïoh ka kot jong ki briew kiba ju shna ïa kine ki tiar. Ka NEHHDC ka ju thied ïa ki tiar shna kti bad ki jain thaiñ kti na ki nongshna tiar bad ki nongthaiñ jain na kylleng ka thaiñ Shatei Lam Mihngi bad die ha ki dukan ba la buh kyrpang ha nongbah Shillong, Guwahati, New Delhi, Varanasi bad Kevadia (Gujarat).
La mihkhmat ban soi ïa ka MoU da u Dr. Arindam Das, Director jong ka NIFT Shillong bad u Brigadier Rajiv Kumar Singh (Retd), Managing Director jong ka NEHHDC ka ban treikam na ka bynta ka lai snem shuwa, bad ka jingthmu ba kongsan ka long ban ai jingkyrshan ïa ki nongshna ïa ki tiar shna kti bad ki nongthaiñ jain ban pyntbit shuh shuh ïa ka kam jong ki bad ban kyntiew ïa kane ka jait kam ha ka thaiñ Shatei Lam Mihngi. Ki bynta ba kongsan ban ïatreilang ha kane ka MoU ki long:
Ka jingsam ïa ki jingnang jingtip bad lad jingïarap ki ban ai jingmyntoi ïa ki nongthaiñ jain bad nongshna tiar kti jong kane ka thaiñ ban pynmih ïa ki tiar shna kti kiba la pynwan dur thymmai ha ki shlem pynmih tiar shna kti (clusters) ba la ithuh da ka NEHHDC.
Ban kyntiew ïa ki kam thaiñ jain bad tiar shna kti jong ka thaiñ Shatei Lam Mihngi lyngba ki lympung bapher bapher kiba ïadei bad ka jingpynwandur (Design), ka buit stad saian (Technology) bad ka jingseng kam (Business).
Ki jingleit jngoh jong ki samla pule bad ki nonghikai jong ka NIFT sha kine ki shlem ba la ithuh da ka NEHHDC ban lum jingtip bad khmih ïa ka rukom shna tiar bad thaiñ kti. Ka NEHHDC kan ïatreilang ruh ha kaba ïadei bad ki ‘Internship’ bad ‘Field Trip’ ïa ki samla pule ka NIFT Shillong bad kiwei ki NIFT Campus.
Ka jingsam ïa ki jingtip ba la dep lum (data) bad ki lad jingïarap lyngba ki shlem jingtip (Resource Centre/Knowledge Management Centre) ba don ha kine ki jaka.
Ka jingpynlong ïa ki jingwad bniah, ki projek bapher bapher, ki prokram ai jinghikai, ki jingïalang bad ki rynsan pyni riam (Fashion Show), ter ter.
Ka NIFT Shillong kan ïatreilang bad ka NEHHDC ha kaba ïadei ban pynjanai ïa ki rukom jingbuh bad jingsong pynitynnat ïa ki tiar shna kti, ka jingjer kyrteng ïa ki tiar ki tar ba la pynmih bad ban khring ïa ki nongthied bad ïa ka iew. MIPR
Facebook
Instagram
Youtube
Twitter
Leave a Reply