Ïasnohktilang ka Khynroo Khyllood Committee Seiñraij haka One Citizen One Tree

Syllad | The Rising MeghalayaJune 6, 2019

JOWAI: Ka Khynroo Khyllood Committee, Seiñraij Jowai kum ka dak ban iasnohktilang bad ka sorkar ha ka jingrakhe burom World Environment Day haka 5 Jylliew ka la pynlong ia ka jingthung dieng ha Dulong Pohali ka jaka badon ka Eco-Friendly Crematorium.

Ha kane ka sngi shwa ban thung ia ki ktynrai dieng la don ka jingialang lyngkot ba la pyniaid da u Ladwan Dkhar, Chairman Khynroo Khyllood Committee, Seiñraij ha kaba laioh ruh ka jingkren na u Ma OR.Challam, President Seinraij Jowai bad ka ngooh ka dem blei da u Sienki Lato, Secretary KKC, Seinraij.

U Ma Challam haba kren u la ong ka Seiñraij hi ha ka nongrim jong ka jinghikai ñiam ka la ialeh ban sumar pyneh pynsah ia ka mei mariang na ki por sha ki por, kumta halor ka thong jong kane ka sngi u la khot bad wer ia ki khun samla ka Seinraij ba kin shim ka jingkitkhlieh nangne shakhmat da kaba thung shuh shuh ia ki dieng ha kiwei kiwei ki jaka kaba long kum shibynta ban pynurlong ia ka thong jong ka sorkar kaba ong One Citizen -One Tree.