Iashimbynta 372 ngut ki nongialehkai haka 29th State Karate Championship 2023″ ka AMKA

Syllad | The Rising MeghalayaDecember 16, 2023

Ka “29th State Karate Championship 2023” ba la khot pynlong da ka All Meghalaya Karate-Do Association (AMKA) hapoh Indoor Stadium, Jawaharlal Nehru Sports Complex, Shillong kala sdang haka 15 tarik Nohprah ha kaba ki la don haduh palat 372 ngut ki nongialehkai kiba la wan ban iashim bynta.

Ia kane ka jingialehkai ba ar sngi kynthih la kyrshan da ka Directorate of Sports and Youth Affairs ka sorkar jylla, ha kaba ki nongwan iashim bynta ha kane ka lympung ki kynthup naduh ki khynnah kiba hapoh ka 10 snem rta haduh kiba la san na ki bynta bapher bapher ka jylla.

Ha kane ka sngi la wan plie ia kane ka lympung ialehkai da u Bah Ransom Sutnga, Co-Chairman ka Meghalaya Industrial Development Corporation Ltd uba long ruh u President ka Mawkhar Sports Club uba ha ka jingkren ula pyrto ia ki sienjam ba la shim da ka  AMKA kaba la lah ban ia kane ka jingialehkai bad khamtam ba ka AMKA naduh u snem 1981 kala lah ban sei haduh 200 ngut ki nongialehkai kiba la khur ia ki takma ha ki rynsan iakob ha ka National Level bad 20 ngut kiba la khur ia ki takma ha ki rynsan kiba la long ha kylleng ka pyrthei ryngkat ka jingkyrmen ba kin nangmih shuh shuh ki khlur ialehkai ki ban wanrah nam.

Na ka liang u Bah Sutnga ula aiti ruh ia ka cheque sha u President ka AMKA, u Bah Hunlang Lytan bad General Secretary Bah Ksan Warjri kum ka jingiarap ia kane ka kynhun ba kan pyntyllun shakhmat ia ki kam ban kyntiew ia ka kam ialehkai Karate.

Katba na ka liang u Working President ka Meghalaya State Olympic Association (MSOA) u Bah John F Kharshiing uba la ia don lang kum u symbud kongsan ula ai khublei iaka AMKA kaba la pynlong ia kane ka championship bad ula ong ba ka jingialehkai Karate kadei kawei na ki jait jingialehkai kaba pawnam bha ha ka jylla. Nalor kata u la  pynshlur ruh ia ki Club bad ki Academy ba kin aplai ban ioh iaka jingiarap lyngba ka YESS Meghalaya Scheme.

Nalor kata ia kane ka lympung  ialehkai la pynlong shi bnai shwa ban sdang ka 5th Meghalaya Games kaban long ha Tura bad ki nongialehkai Karateka kila ioh ia ka jingpynshlur ban shimkabu ia kane ka rynsan iakob kum ka jingpynkhreh na ka bynta katei ka lympung kaba heh.

Shuh shuh na ka liang u Bah Kharshiing ula ong ba ka Meghalaya Games kadei ka jingpynkhreh na ka bynta ka National Games, ia kaba ka jylla Meghalaya kan sa pynlong ha kine ki snem ban wan.