Iashim bynta ka YesEarth, Rotary Club bad NCC ha kaba pynkhuid ia ka wah Umshyrpi

Syllad | The Rising MeghalayaOctober 2, 2023

Ban pynpaw ia ka jingdon mynsiem ban tei ia ka imlang ka sahlang bad ban pynneh pynsah ia ka jingkhuid jong ka mei mariang na ka liang ka Yes Earth Youth Corps bad ka Rotary Club Shillong Heritage ki la  iashim bynta ban pynkhuid ia ka wah Umshyrphi haka sngi Saitjain.

Ha kane ka prokram la wan iasnohkti lang ruh da ki dkhot ka National Cadet Corps (NCC), Rotary District 3240 bad ka Shillong Municipal Board ha kaba la sakhi ruh ia ka jingkylla ia ka jinglong jingman jong kane ka wah Umshyrpi.

La sdang ia kane ka jingpynkhuid lyngba ka jingkaweh lama da ka Kong RM Kurbah, Deputy Commissioner ka East Khasi Hills.

Haduh palat 100 ngut ki dkhot ka NCC cadets, ki dkhot ka Rotary Club, ki heh bad ki staff ka Shillong Municipal Board nalor ki nongshong shnong jong katei ka jaka ki la iashim bynta shitrhem ha kane ka jingpynkhuid ia kane ka wah.

Na ka liang ka Kong RM Kurbah ka la pyrto halor kane ka sienjam da kaba ong; “Ka jingpynkhuid ia kane ka wah ka pynpaw halor ka bor jong ka jingiatreilang hapdeng ki  nongshong shnong. Ka jingkut jingmut ka jong ngi ban pynneh pynsah ia ki tyllong um ka dang iai bteng. Ka jingjop lyngba kane ka sienjam ym tang ba kan pynmyntoi tang ia ngi mynta hynrei kan pynthikna ruh ia ka jingkhuid bad ia ka mariang kaba koit ba khiah na ka bynta ki pateng ki ban wan.” 

Kumjuh na ka liang u Abhijit Sharma uba dei u Mission Director ka YesEarth Youth Corps ruh u la pynpaw ka jingsngew sarong halor kaei kaba ki la ioh kheit lyngba ka jingpynkhuid ia kane ka wah na ka bynta ban iada ia ka mei mariang.U pynpaw ruh ka jingkyrmen ban pyniaid shakhmat ia kane ka jingjop bad ban bteng ia ka thong ban iada ia ki um ki wah bad ki jingdon jingem jong ka mariang.

Kiwei pat kiba la aijingkren ki kynthup ia u Hemen Kalita, Vice President bad Jasbir Singh Secretary ka  Rotary Club Shillong Heritage kiba la iai ban ba ka Club ka don ia ka thong ban aijingkyrshan halor baroh ki sienjam kithmu ban wanrah ia ka jingkylla hapoh ka imlang ka sahlang hi baroh kawei.