Iashim bynta ka Meghalaya ha ka jingrakhe ia ka ‘Viksit Bharat Sankalp Yatra’ ban wanrah jingkylla

Syllad | The Rising MeghalayaNovember 15, 2023

Ka Jylla Meghalaya ka la iashim bynta lang bad baroh kawei ka ri ban rakhe ia ka jingsdang jong ka “Viksit Bharat Sankalp Yatra,” ka sienjam ban wanrah jingkylla kaba thmu ban pynpoi ia ki kam sha ki jaka bym pat poi bad ka jingpynpoi ia ki skhim Sorkar.                    

Ka jingpeit bniah jong kane ka yatra ka dei ban ai jingtip sha ki briew bad ban pynpoi ki jingmyntoi jong ki skhim kum ki lad na ka bynta ka jingkhuid jingsuba, ki jingshakri ha ki kam pisa, ka bording ilektrik, ka jingioh ia ka tyndong LPG, ki iingsah ia ki briew kiba duna jingioh, ka jingshngain ha ka jingioh mar bam, ka bam kaba tei met, ki lad ai jingsumar kiba shngain, ka umdih kaba khuid bad kiwei kiwei. Ia ka jingpynrung kyrteng ia kito kiba dei ban ioh jingmyntoi yn leh katkum ki jingshem ba ioh ha kane ka Yatra.

Ha Meghalaya, kaViksit Bharat Yatra ka dei kaba la plie paidbah ha East Khasi Hills district hynne ka sngi. Ka Yatra kan long ha baroh ki Gram Panchayat (GP)/Block jong ka West Jaintia Hills, East Garo Hills bad North Garo Hills district ruh.

U Chief Secretary, Bah DP Wahlang u la pyllait paidbah ia ka kali kaba rah ia ka khubor jong ka “Viksit Bharat Sankalp Yatra” na Meghalaya Legislative Assembly Secretariat, Khyndailad, Shillong haba u la plie paidbah ruh ia ka Jan Jatiya Gaurav Divas (Tribal Pride).

Ha ka jingkren u la ban jur halor ka jingieng skhem ka jylla halor ka Viksit Bharat Sankalp Yatra kaba long ha baroh kawei ka ri. U la ong ba kane ka yatra ka dei ka dak jong ka sienjam kaba heh na ka bynta ka India kaba la kiew shaphrang bad kaba ai bynta ia baroh ha kaba ka don ka jingbahkhlieh jong baroh na ka bynta ka roi ka par bad ka jingriewspah jong ka ri. U Chief Secretary u la plie paidbah ruh ia ka jingiaid kjat ban pyni ia ka deiriti halor ka Tribal Pride da ki barikor, ki kynhun pyni deiriti.

Ha ka prokram jong ka jylla ban rakhe ia ka Jan Jatiya Gaurav Divas (Tribal Pride) kaba la pynlong ha U Soso Tham Auditorium, Shillong, u Myntri ka tnat Arts & Culture ha kaba la ia don lang ruh u Bah Paul Lyngdoh kum u kongsan katba u CEM, KHADC, u Bah Pyniaid Syiem u la long u symbud kongsan. 

La pynlong ruh ka jingbuh syntiew hakhmat ki mot jong ki riewshlur jong ka jylla da ki heh ki hain. La don ruh ka tribal museum kaba pyni ia rukom shet, ki rukom shna tiar bad ka deiriti jong ki riewlum ha kane ka prokram.