Iashim bynta ka Meghalaya ha ka ‘International North East Festival’ kaba nyngkong ha Vietnam

Syllad | The Rising MeghalayaOctober 30, 2023

Shibynta jong ka “International North East Festival” kaba dang iaid shakhmat ba la khot pynlong da ka Consul General Ho Chi Minh ha sorbah Ho Chi Minh City, Vietnam kaba hap hapoh ka jingkhmih jong ka Ministry of External Affairs, ka Meghalaya kaba la pyniasoh ialade bad ka thain South Asia bad khamtam ka Vietnam, lyngba ka Tnat Textiles, Trade, Tourism bad Craft, Cuisine bad ka Tnat Culture ki la mihkhmat ia ka Meghalaya ha kane ka tamasa NE Festival kaba nyngkong eh ha Vietnam.

Ki kynhun bad ki nongmihkhmat ki la iashim bynta shitrhem ha kiba bun ki jingialang, ki exhibition, ki jingialang kiba iadei bad ki kolshor lyngba ki nongmihkhmat sorkar, ki nongseng kam na ki kynhun shna kti bad thain jain (Textile), kolshor (culture) bad ki kynhun nongtem kiba la pynpaw ia ki lad ki kabu kiba ka Meghalaya ka don ha ka liang ki kam khaii pateng bad ki kam bei tyngka, ha kaba la khmih ruh ia ka bynta kaba iadei bad ka Textile sector kum ka jaka pynleit jingmut.

U Myntri Khynnah kam bar ri ka Sorkar Pdeng u RK Ranjan Singh u la plie paidbah ia kane ka “North East Festival” ha ryngkat u Chairman & Head ka Ho Chi Minh Province ka Sorkar Vietnam ha ryngkat ka jingiadon lang u Nonglamktien ka India ha Vietnam, u Consul General bad kiwei pat ki nongmihkhmat na ki jylla ka thain North East.

Na ka liang u Chairman jong kumba 25 tylli ki jylla hapoh ki province ka Vietnam, ki nongtreikam lajong ba pawkhmat ka Vietnam, ki tour operator ki la pynpaw ia ka jingdon mon ban pyniasoh ha kaba iadei bad ki jingtreikam kiba iadei bad ka Textile, tnat Tourism bad ka jingiasam jingtip ha kaba iadei bad ka kolshor bad ka Meghalaya.

Kumjuh ka Tnat liengsuin ka Malaysia kaba pynher liengsuin sha Dhaka ka la pynpaw ia ka jingangnud ban pyniar ia ka lynti iaid na ka bynta ki kam jngohkai pyrthei sha Meghalaya lyngba ki lynti khyndew, bad la pynbna ruh ba ka tnat liengsuin ka Vietnam shen kan sa pynher liengsuin na Hanoi / Ho Chi Minh City sha Guwahati.