Iaroh ka Dr Ampareen ia ka hukum ka Iingkashari halor ka mukotduma thungkam nonghikai

Syllad | The Rising MeghalayaSeptember 5, 2025

Ka Myntri Sorkar Jylla, ka Dr Ampareen Lyngdoh ha ka 4 tarik Nailur ka la ai ka jingiaroh halor ka hukum ba la pynmih da ka iingkashari Meghalaya High Court kaba la pynksan ia ka na ki jingkynnoh leh bymhok ha ka jingthungkam Assistant Teacher jong ki skul Lower Primary ha ka mukotduma kaba la iaid la 17 snem mynta.

Ka Dr Ampareen kaba dei ka Myntri barim ka Tnad Pule Puthi ha ryngkat arngut ki ophisar ki la shah kynnoh donkti ha kaba pynkylla ia ki score sheet ban iarap ia ki katto katne ki kyrtong ha ka jingjied ia ki Assistant Teacher ha ki skul Govt Lower Primary.

Haba ai jingkren sha ki lad pathai khubor hadien ba la pynmih ia katei ka hukum da ka Iingkashari, ka Dr Ampareen ka la pynpaw ia ka jingsngew laitluid bad ka jingsngewnguh da kaba ong, “Nga la shah ktah jur shibun mynta la 17 snem kynthih.”

“Mynta nga kynmaw ia i mei ba la khlad noh, nga ong ia i mei ba nga khlem leh hynrei ka la shah pynbor khlem sangeh, im don shuh hangne ban ialehkmen na ka bynta kane ka sngi kaba khraw. Nga kynmaw ia u hymmen ba la khlad noh, u Bah RG Lyngdoh, uba wat hapdeng kine kiei kiei, u ju ong ia nga ba lada phim shym la leh, phi dei ban iai bteng ban shakri ia u paidbah.”

Ka la ai khublei ruh ia kiba haiing hasem, ki nongkyrshan bad ka kynhun ki nongiasaid ain kynthup ia u Senior Advocate Salman Khurshid kiba la ieng ha syndah jong ka ha baroh kine ki jingeh kiba iakynduh.

“Kane ka hukum ba la pynmih mynta ka sngi ka pynskhem ia ka nongrim jong ngi. Ka kyrteng jong u Bah Peter Garnett Marbaniang kam shym la shah pynjah burom. Ngi dei ka longiing kaba bat ia ka jingleh hok bad ban ai ka jingshakri kat kaba lah na ka bynta u paidbah ka jylla,” ong ka Dr Ampareen.

Nalor kata, ka la pynpaw ruh ka jingsngewnguh ia ka jingtreikam jong ki Iingkashari da kaba ong, “Kane ka ri kan iai bteng ban iakhun beit na ka bynta ka hok, bad kane ka dei ka hok kaba nga ioh mynta ka sngi.”

Ka Myntri ka la ai khublei ruh ia ki nongkyrshan jong ka namar ka jingngeit ha ka bad ban jied biang ia ka kum ka MLA wat hapdeng ki jingkynnoh. Ka la ong ruh ba kan sa duwai lem na ka bynta kito kiba kynnoh bymdei pyrshah ia ka bad ong, “U Blei un ai ha nga ia ka jingai ei ban map ia iwei pa iwei na phi.”