Iarap marbam ka JHDS sha ki 300 longïing ba shah ktah haka khlam COVID-19

Syllad | The Rising MeghalayaOctober 14, 2021

Kum shibynta ban kyrshan iaki para briew kiba shah ktah haka khlam COVID-19, kaba la wan lyngshop haka sien kaba ar, ka Jaintia Hills Development Society (JHDS) sa shisien ka la kner biang la ki kti jingïarap ban synñiang da ki mar bam sha ki 300 tylli ki longïing jong ki hynriew tylli ki shnong ka West Jaintia Hills District.

Ïa kine ki mar bam ka JHDS ka la sam paidbah haka 13 tarik bad 14 tarik Risaw haka shnong Nangbah, Pasyih, Kyndong Tuber, Mihmyntdu, Ïongnoh bad Mupyut.

Hashwa ban aiti ïaki mar bam sha ki nongïoh jingmyntoi, u Director ka JHDS u Phadar Manbha Pakem ula ïathuh ba kane ka jingsynñiang kadei lyngba ka jingiatrei lang jong kiba bun kum ka Catholic Agency for Overseas Development bad ka Caritas India.

U Denis Kurkalang Coordinator JHDS ula ïathuh ïaka jingïaid lynti jong ka JHDS, naduh ba la sdang ïaka ha u snem 2006 ka dei ban peit iaka bha ka miat ka imlang ka sahlang naduh ka pule ka puthi, ka koit ka khiah bad ka roi ka par ki nongshong shnong.

Ula iathuh ba ki marbam kiba la iarap ha kane ka kynti ki kynthup ia u khaw, shana, nutrela bad ka umphniang.