Iap sa 4 ngut kynthup 3 ki heprit na ki jingjia ther ‘lapbah ha kylleng ka jylla

Syllad | The Rising MeghalayaMay 31, 2025

Haduh sawngut ki briew kynthup ia laingut ki heprit ki la duh noh ia la ka jingim bad uwei pat u la ngat ha ka jingmynsaw na ki jingjia  jong ka jingther ‘lapbah ha ki bynta bapher bapher ka jylla haka sngi Saitjain.

Uwei u khynnah uba dang 14 snem uba kyrteng u Mebanskhem Mukhim na ka shnong Kharang, East Khasi Hlls u la khlad noh na ka jingkhyllem jong uwei u dieng na ka jingshah jynrat ha ka lyer kaba jur.

Arngut kiwei pat ki heprit kata u Batgrikchi A Sangma 7 bad u Brime D Sangma 13 snem rta na ka shnong Kentapara kaba hap hapoh West Garo Hills ki la khlad noh hadien ka jingshah pom pyrthat, katba uwei pat uba kyrteng u Nikolas Kharpran 36 snem rta na ka shnong Kyrdeng ha Ri Bhoi District u la khlad noh hadien ba u la ngam jyllop ha wah Umiew hapoh ka shnong Mawkduk, ong ka khubor sorkar.

Haduh mynta ka jingdon jong ki briew kiba la duh noh ia la ka jingim ha ki jingjia bapher bapher kiba la pynlong na ka jingther u ‘lapbah naduh kine ki lai sngi ba la dep ka la kynjoh sha ka 6 ngut bad 4 ngut kiba mynsaw.

Kane ka jingther u ‘lapbah bad ka jingsyllad ka lyer ba jur ka la wanrah ruh ka jingjulor ia palat 16 tylli ki iing ki sem ha ki 24 tylli ki shnong bad kaba la ktah ia palat 71 ngut ki dkhot jong ki longiing nalor ka jingpynjulor ia ki phra tylli kiwei pat ki jingtei bapher bapher.

Katkum ka kaiphod ba la pynmih da ka Meghalaya State Disaster Management Authority (MSDMA), haduh palat 1094 ngut ki nongshong shnong ha ki 49 tylli ki shnong kiba hap hapoh ki 23 tylli ki block ki la shah ktah katba 28 tylli ki iing ki sem bad 33 tylli ki jingtei bapher bapher ki la shah pynjulor naduh kine ki lai sngi ba la dep, kata naduh ka 29 haduh ka 31 tarik Jymmang.