Iap ka longkmie, mynsaw ki khun na ka jingtwa khyndew, iap u rangbah ba shah rah umsaw ha East Khasi Hills

Syllad | The Rising MeghalayaMay 30, 2025

Arngut ki briew ki la duh ei ia la ka jingim katba arngut kiwei pat ki la ngat ha ka jingmynsaw na ki jingjia twa khyndew bad jingshlei um kiba la jia haka sngi Thohdieng ha ki bynta jong ka East Khasi Hills hadien ka jinghap slap kaba khlem sangeh naduh ka sngi Palei ba la lah.

Ha kane ka jingjia kawei ka longkmie kaba kyrteng ka Klosliya Kharkongor 45 snem rta ka la duh ei ia la ka jingim hadien ba ka jingtwa khyndew ka la tep ia ka iingsah jong ka ha ka shnong Lumkyntung kaba hap hapoh Khatarshnong Laitkroh Block, katba ki arngut ki khun jong ka, kata ka Batihun Kharkongor 14 bad ka Ranika Kharkongor 22 snem rta ki la ngat ha ka jingmynsaw ha kane kajuh ka jingjia ha kaba la pynkit noh ia ki shapoh Swer PHC ban ioh jingsumar.

Ha kawei pat ka jingjia haka por nohphai sngi uwei u briew uba kyrteng u Samborlang Tariang u la khlad noh hadien ba u la shah rah ha ka umsaw katba u dang jam lyngba ia ka wah Krot ha Mawbynna kaba hap hapoh Mylliem Block ha kaba ia ka met jong u la ioh ban sei noh hadien katto katne por.

Ka Tnad District Disaster Management Authority (DDMA) ka la pynthikna ba kane ka jinglong jingman jong ka suinbeng ka la wanrah ruh ka jingjulor jong ki sawtylli ki iing bad artylli ki dukan kaba la pynmynsaw ia laingut ki briew.

Nalor kata la sakhi ruh ia kiba bun tylli ki surok ba kongsan kiba la shah ktah jur na ki jingtwa khyndew bad ka jingshlei um kiba la ktah jur ia ka leit ka wan.