Ialap pynsngewthuh ka Jingiaseng Samla Jowai Presbytery bad ka JMB halor ka jingkhuid jingsuba ha ki jaka paidbah

Syllad | The Rising MeghalayaJune 2, 2025

Ka Jingiaseng samla Jowai Presbytery Socio & Economic Life Development ryngkat ka jingiatreilang ka Jowai Municipal Board (JMB) kala pynlong iaka Awareness prokram halor ka phang Civic Cleanliness (Waste Management).

Ia kane ka awareness la pynlong haka 31 tarik Jymmang ha Indoor Hall ka Chutwakhu kaba la iashim bynta da kiba bun ngut ki samla ka Jowai Presbytery haka jingialang kaba la pyniaid da u Rev. D.M. Passah Chairman ka S&ELD.

Ki riew shemphang kiba la wan ban ai jingbatai halor katei ka phang ki long ka Kong Palvy Dora Kharkongor, Kong Larisa Lakadong kiba dei ki IEC Specialist, SMB (Urban), Meghalaya.

Ha kane ka sngi la donlang ruh u Chairman ka Jowai Municipal Board (JMB) Ma Philanderwell Lyngdoh uba la kyntu iaki nongwan iashim bynta ban long ki briew kiba don ka jingkit khlieh khnang ban bit ban biang ka pateng ban wan.

Ula pyntip ruh ba ka Jowai Municipal Board kala pyrshang ban leh kiei kiei na ka bynta ban pynbha pynmiat bad pynkhuid iaka sor Jowai hynrei u pynpaw pat ka jingsngewsih namar ki nongshong shnong tang ban bit ban biang ialade kim salia ban bret pathar iaki jaboh jabain ha kano kano ka jaka kaba ki imon.

Kane ka dei ka sien kaba nyngkong ba ka JMB ka iatreilang bad ka Jowai Presbytery bad kadei ruh ka por kaba biang eh iaka Jowai Presbytery ba kan sdang ban hikai iaki khun samla na ka bynta ka jingkhuid jingsuba, la ong u Chairman ka JMB da kaba u kyntu ruh ia baroh ki nongiashim bynta ban long ki nongrah ktien jong ka jingkhuid jingsuba haki iing ki sem, ki shnong ki thaw bad ki Balang.

Ki riew shemphang kila batai bniah halor ka Solid Waste Management Rules 2016 bad kila ban jur ruh halor ka jingdonkam ban phiah iaki jaboh kiba mih naki thliew iing.

La kyntu ruh ia baroh ban pyniakhlad iaki jaboh kiba lah ban pyut bad ki bym lah ban pyut bad ka jingdonkam ban ym bret pathar iaki nuit ha kaba kane kam dei ruh tang ban bud iaki kyndon hynrei ban don ruh ka jingkitkhlieh.