Iakynduh u Lat ia ka Rifiness Warjri nongkiew lum ba ba jop ia u lum Everest, angnud sa 7 tylli ki lum

Syllad | The Rising MeghalayaJuly 17, 2025

U Lat ka Jylla u CH Vijayashankar haka 16 tarik Naitung u la iakynduh bad leh burom ia ka samla Rifiness Wajri ka nongkiew lum kaba dang khynnah tam na ka jylla Meghalaya kaba la pyndep ban kiew ia u lum Everest, kata ha ka rta kaba dang 20 snem.

Ka samla Rifiness kaba pule Botany ha St Anthony’s College bad dkhot NCC ka la lah ban pyndep ban kiew ia une u lum uba jrong tam ha ka pyrthei ha ka 18 tarik Jymmang 2025, bad ka dei ruh ka kynthei kaba lai na ka jylla ka ban poi sha kliar jong une u lum.

Ha kane ka jingiakynduh, ka samla Rifiness ka la pynpaw ruh ia ka sap rwai jong ka da kaba rwai ia ki artylli ki jingrwai, kata ka jingrwai ieit ri bad ka jingrwai Khasi kaba la pynkhih mynsiem shibun ia u Lat ka Jylla.

U Lat u la khot sngewbha ruh ia ka samla Rifiness ban rwai ha ka sngi rakhe laitluid ne Independence Day ha Raj Bhavan da kaba ithuh ia ka kum ka nongmuna ia kiwei pat ki para samla khamtam ia ki khynnah kynthei kiba wan na ki longiing ki bym da bit da biang.

U la ong ruh ba ka Rifiness ka la pynpaw ia ka mynsiem jong ka jingkut jingmut bad ka jingsarong ia la ka jong ka kolshor. Ka jingdon ryngkat jong ka ha kane ka sngi rakhe laitluid kan noh synniang ia ka jingai mynsiem jong ka sha kiba bun kiwei pat ki samla ha kylleng ka jylla.

Da kaba kyntait ban shongthait noh lyngba kane ka jingjop ka jong ka, kane ka samla mynta ka don ia ka jingangnud ban jop ia ki hynniew tylli ki lum- kata ki lum ba jrong tam ha baroh ki hynniew tylli ki dewbah, kaba kynthup ia u lum Denali, Kilimanjaro, bad Vinson Massif.

Kane ka jingjop jong ka samla Rifiness ka la ioh pdiang ruh ia ka jingpynkup burom na ki riew pawkhmat kiba kynthup ia u Myntri Rangbah ka Jylla u Conrad K Sangma bad u Myntri ka Tnad Iada ri u Rajnath Singh.

Ka jingtrei shitom bad ka jingaiti lut jong ka Rifiness ha ki kam kiew lum ka la paw shai lyngba kane ka jingjop ba dang shen ban kiew ia u lum Everest bad ka jingkiew ia u lum Mount Abi Gamin ha u bnai Nailur 2024.