Iakynduh u Bah Prestone Tynsong ia u Pope Leo XIV ha Vatican, kyrkhu na ka bynta ka Jylla

Syllad | The Rising MeghalayaAugust 21, 2025

U Symbud Myntri Rangbah ka Jylla u Bah Prestone Tynsong ha ka 20 tarik Nailar u la iakynduh markhmat ia u Pope Leo XIV ha ka jingialang ba shimet ha Vatican.

U Bah Prestone u dei uba nyngkong eh na Meghalaya u ban iakynduh ia u Pope Leo tang hapoh lai bnai hadien ba une u rangbah niam u la shah jied kum u khliehduh jong ka Balang Katholik bad ka Vatican City.

Une u Myntri ka Jylla u la pan ruh ia ki jingkyrkhu jong une u rangbah niam ba hakhliehduh na ka bynta ka jylla Meghalaya. Ka Jylla Meghalaya ka long shisha kaba la kyrkhu da ka jingdon ryngkat u nongialam jong ka uba la ioh ia ka kabu ban iakynduh ia u Pope da lade hi shimet.

Ha kane ka jingiakren kaba naduh ka dohnud, u Pople u la ai ia ka jingkyrkhu ka jong u na ka bynta u Bah Prestone bad ia ka jylla hi baroh kawei. U la ai mynsiem bad pynskhem ia ka jingdonkam ban pynroi ia ka jingsuk bad ka jingiatylli ha ka jylla.

Kane ka jingiakynduh ka la long ha ka por ba dang iakren shaphang ka jinglong jingman jong ka jylla Meghalaya, ha kaba u Symbud Myntri Rangbah da ka jingsngewrit u la pan ia ka jingkyrkhu na u Pope ia ka jylla Meghalaya. U Pope u la iaroh ia ka jingpyrshang ba khlem salia jong ki nongialam sain hima bad nongialam niam ka Meghalaya ha ka jingpyrshang ba khlem sangeh ban tehlakam ia ki jingeh kiba la don lypa hapoh ka jylla.