Iakynduh ka KAS ia u CM ka Jylla ban dawa ithuh noh ia ka ktien Khasi kum ka ktien pura ka jylla

Syllad | The Rising MeghalayaOctober 16, 2023

Ki nongmihkhmat ka Khasi Authors Society haka sngi Nyngkong ki la dawa na ka sorkar jylla ba ka dei ban ithuh noh ia ka ktien Khasi kum ka ktien pura ne kum ka Ktien Sorkar (Official Language) jong ka jylla hadien ka jingdawa kaba la iaid mynta la slem slem bah.

Kitei ki nongialam ka KAS ki la leit ruh ban aiti da ka dorkhas sha u Myntri Rangbah ka jylla u Conrad K Sangma ha kaba iadei bad kane ka phang.

Ha jingiakynduh ia u CM ka jylla na ka liang u President ka KAS u Dr DRL Nonglait ula ong ba ka KAS kala dawa na ka sorkar jylla ba ka dei ban ithuh noh ia ka ktien Khasi kum ka Ktien ba pura jong ka jylla namar kumba long mynta ka Ktien Khasi ka dei ka Associate Official Language ha ka jylla.

 Ula ong ruh ba ka KAS kam don satia kano kano ka jingpyrshah lada ka sorkar jylla ka ithuh lang ia ka ktien Garo kum ka Official Language ka jylla bad ka sorkar jylla kadei ban pynkylla noh ia ka Meghalaya Language Act 2005 namar kumba long mynta ka Ktien nongwei ne ‘English’ ka dei ka Official Language ka jylla ne ka ktien ba pura ba la ithuh da ka sorkar.

Shuh shuh hadien kane ka jingiakynduh ia u CM na ka liang u Dr Nonglait ula iathuh ba na ka liang une u Myntri ula kular ba yn khmih bniah ha kaba iadei bad kane ka jingdawa bad yn sa bthah ia ka Tnat kaba dei khmih ban leh ia kaba donkam.

Nalor kata u la ong ba ka KAS kala dawa ruh ba ka sorkar jylla ban phah da ka jingthoh sha ka sorkar pdeng ban pynrung noh ia ka ktien Khasi ha ka Khyrnit kaba Phra jong ka riti synshar Ri.

Nalor kata u president ka KAS u la ong ba ki la pyntip sha u CM ba ha ka 29 bad 30 tarik u Nailur ba la dep ki la pynlong ia ka ‘National Seminar’ ha New Delhi bad pynlong ruh da ka jingiakhih kaba jai jai ha Jantar Mantar na ka bynta ban dawa ban ithuh noh ia ka Ktien Khasi.

“Ngi la shim ruh ia ki rai kiba kynthup ban pan jingpynshai na ka Ministry of Home Affairs halor ka jingiaid shakhmat ha kaba iadei bad kane ka jingdawa ka jong ngi bad ban kyntu ruh ia ka Sorkar Pdeng ba kan shim ia ki sienjam ban wanrah da ka official Bill ha ka jingialang ha ka dorbar Parliament ka ban wan bad khnang ban lah ban kynthup ia ka Ktien Khasi ha ka Khyrnit kaba Phra jong ka riti Synshar Ri.