Iakhaid ki jingiakhun Super Div ka EJHDFA, ka Sutnga haka kyrdan kaba hakhliehduh

Syllad | The Rising MeghalayaDecember 2, 2023

Ki ar ki jingialehkai football haka kyrdan Super Division Football Tournament kaba pyniaid da ka East Jaintia Hills District Football Association (EJHDFA) kila kut noh da kaba iakhaid haka sngi Thohdieng.

Haba phai sha ka jingialehkai kaba long hapdeng ka Rymbai Shkenshynriah pyrshah iaka Moolamanoh ka la kut da mar 2-2 kaba long ha madan artificial turf ha Diengshynrum.

Na kaliang ka Rymbai Shkenshynriah ia kine ki ar kol la thep da u Ribha Dkhar haka minit kaba 28′, 33′. Ki ar kol ka Moolamanoh SC pat la thep da u Kiming Dkhar haka minit kaba 37′ bad u Jesly Sungoh (own goal) haka minit kaba 90’+1.

Ha kawei pat ka jingialehkai Rymbai Wahshnong bad ka Khliehriat West YWSC, kane ka jingialehkai ruh kala kut noh da kaba iakhaid mar 1-1. U Pyndap Bareh ka Rymbai Wahshnong haka minit kaba 42′ ula ioh pynkhih iaka jar. Na ka Khliehriat West ia kane ka shi kol la thep da u Sandy Kassar haka minit kaba 54′ kaba mih paw haka dur jong ka penalty.

Shuh shuh haba phai sha ka miej iakhein point na ki 6 tylli ki jingialehkai bala dep, ka Sutnga SSCC kala wan haka kyrdan kaba hakhliehduh da kaba kamai 16 point, bud sa ka Rymbai Shkenshynriah SC 11 point, ka Khliehriat West bad ka Dhana mar 8 point, Rymbai Iawpynsing 6 point, Thangskai Tiger 5 point, Rymbai Wahshnong 4 point bad ka Moolamanoh 2 point.

Ka jingialehkai ka kylla ba nyngkong kala jan poi artad sha kaba kut bad shuwa ban jam sha ka semifinal ki jingialehkai kiba dang sah ki long hapdeng ka Rymbai Shkenshynriah pyrshah iaka Khliehriat West bad ka Moolamanoh pyrshah iaka Rymbai Wahshnong kaban long haka 4 tarik Nohprah.

Ka jingialehkai kaba khatduh kan long haka 6 tarik Nohprah, ka Dhana pyrshah iaka Rymbai Shkenshynriah, Rymbai Wahshnong pyrshah iaka Thangskai, Rymbai Iawpynsing pyrshah iaka Moolamanoh, ka Sutnga pyrshah iaka Khliehriat West.