Iakhaid ka Thangskai Tiger vs Sutnga bad ka Chiehruphi vs Rymbai Iawpynsing haka Super Div ka EJHDFA

Syllad | The Rising MeghalayaNovember 14, 2024

Ka ar tylli ki jingialehkai hapdeng ka Thangskai Tiger SC pyrshah iaka Sutnga SSCC bad ka Chiehruphi pyrshah Rymbai Iawpynsing kila kut noh da kaba iakhaid mar 1-1 haka Super Division Football Tournament kaba pyniaid da ka East Jaintia Hills District Football Association (EJHDFA) kaba long ha madan artificial turf ka EJDSA, Diengshynrum haka 14 tarik Naiwieng.

Ka jingialehkai hapdeng ka Thangskai Tiger SC bad Sutnga SSCC, ka Sutnga kala tam shakhmat tang hapoh 1 minit bala iaid ka jingiakhun lyngba u Raplangki Lyngdoh, katba ka Thangskai kala ioh iaka lad ban tan kylla iaka jingiakhun haka minit kaba 19 lyngba u Vendy Nongtdu.

Ka jingialehkai kaba bud ka Chiehruphi SYWSC pyrshah iaka Rymbai Iawpynsing SC ruh kala kut da kaba iakhaid mar 1-1. Ia ka kol na kaliang ka Chiehruphi la thep da u Premi Muksor (26), katba ka Rymbai Iawpynsing SC kala lah ha kaban pyniakhaid haka kylla miet lyngba ka kol kaba la thep da u Thrangdor Swer (78).

Haka 15 tarik Naiwieng ka jingialehkai kan long hapdeng ka Dhana SC bad Ladrymbai B SC haka por 11.45 baje mynstep. Ka Khliehriat West YWSC bad Rymbai Shkenshynriah SC haka por 2.15 baje nohphai sngi.