Iakhaid biang ka Lajong FC ha ka jingiakhun pyrshah ia ka Sreenidi Deccan ha ka I League

Syllad | The Rising MeghalayaNovember 14, 2023

Sa shisien pat ka kynhun ialehkai ka Shillong Lajong FC ka la sei ia ka buit ka bor jong ka ba kan lah pat ban pyniakhaid da mar 2 kol pyrshah ia ka Sreenidi Deccan FC, ha ka  jingiakhun ha la iing ha ka jingialehkai I league kaba la long haka sngi ba Ar ha madan SSA First Ground Stadium ha Polo.

Haba phai sha ka jingiakhun dei ka Sreenidi Deccan kaba la ioh ban pynkhih nyngkong ia ka jar kaba la wan lyngba u Rosenberg Gabriel 7′, hynrei ha ka minit kaba 24′ u Ronney Wilson Kharbudon u la ioh ia ka kabu ksiar ban pynphai kylla ia kane ka shi kol ba ka Lajong ka la shah tam shakhmat, bad kane ka kol ka la pynkhih win hi puk ia ka stadium baroh kawei namar ba u samla Khasi un pynpaw ia ka sap bad ka jingtbit ka jong u ban ioh thep ia kane ka kol.

Hadien kane ka kol na u Wilson ka Lajong kaba la ioh mynsiem bha ka la sdnag ba kan nion tyngeh shakhmat bad hadien kane ka kol ka la ioh ia ka kabu ksiar ba kan thep ia ka kol kaba ar lyngba u Takuto Miki 34′, kaba la nang pynkhihwin shuh shuh ia ka SSA stadium.

Hynrei ka Sreenidi Deccan hadien ba ka la shem bad iohi ia ka rukom ialehkai ka Lajong, ki la sdang shwa ban kyntiew iala ka rukom ialehkai ka jong ki, bad ha ka minit kaba 63′ sa shisien u Rosenberg u la ioh ia ka kabu ban thep ia ka kol  na ka bynta ka Sreenidi Deccan bad  ka Sreenidi Deccan kaba la shem bad sngewthuh ia ka jingkordor ka shi poin, kala sdang ba kan tehlakam noh ia kane ka jingiakhun ha lade bad ban bteng ban ialehkai pynlut ia ka 90 minit ka por kaba pura na ka bynta ban khur ia ka shi poin.

Haba pynshong nogrim ia kane ka sur ialehkai, lehse ka Lajong kan jin da kham jew ka mynsiem ba kam shym la lah ba kan pynurlong ia kane ka resol sha ka jingjop, kata namar kane kan dei ka sien iakhaid kaba lai ha ka jingioh ban aireng biang ka jong ka ha ka I. League.